Nyuma yamezi 18 adatoza, Frank Lampard w’imyaka 46, wahoze ari umukinnyi ukomeye wa Chelsea n’Ikipe y’Igihugu y’u Bwongereza, yahawe akazi ko kuba umutoza mukuru wa Coventry City.
Frank Lampard yasinye amasezerano y’imyaka ibiri n’igice mu ikipe izwi ku izina rya "Sky Blues," ubu iri ku mwanya wa 17 muri Championship, ikaba iri mu murongo wo kurwana no kutamanuka mu cyiciro cya Gatatu.
Lampard yaje gusimbura Mark Robins, wari umaze imyaka irindwi atoza iyi kipe ariko akirukanwa kubera umusaruro muke, aho Coventry City iri hejuru y’umurongo wo utukura n’amanota abiri gusa.
Mu rugendo rwe rushya, Lampard azaba yungirijwe n’abatoza ,Joe Edwards na Chris Jones, bamaze igihe bakorana mu makipe atandukanye harimo Chelsea.
Doug King, nyiri ikipe ya Coventry City, yavuze ko ashimishijwe cyane no kwakira Lampard nk’umutoza mukuru w’ikipe.
Ati: "Frank yatangiriye urugendo rwe rw’ubutoza muri Championship kandi azi neza ibyo bisaba kugira ngo ugire intsinzi muri iri rushanwa.
Ubumenyi bwe mu makipe akomeye nka Chelsea na Everton buzafasha ikipe yacu ifite impano kugera ku rwego rwo hejuru rw’intsinzi dushaka kugeraho."
Lampard yari amaze igihe atagira akazi nyuma yo kuva muri Chelsea mu 2023, aho yari yagarutse by’agateganyo nk’umutoza nyuma yo gusimbura Graham Potter.
Yabaye umutoza wa Derby County mu 2018, ayifasha kugera ku mukino wa nyuma wa "play-off" yo kuzamuka muri Premier League.
Yatoje Chelsea bwa mbere mu 2019, ayigeza muri UEFA Champions League mu mwaka wa mbere. Nyuma yaho, yerekeje muri Everton, ariko ntiyagira umusaruro ukomeye.
Lampard azatoza umukino wa mbere muri Coventry City ku mukino bazakiramo Cardiff City kuri CBS Arena
ku wa Gatandatu.
Eng
RSS 
TANGA IGITECYEREZO