APR FC iri kuzanzahuka yiturije

Ku mugoroba wo kuri uyu wa Gatatu itariki 27 Ugushyingo 2024, ikipe ya APR FC yatsinze Bugesera FC  ibitego bibiri ku busa, ihita iva ku mwanya wa 10 n’amanota 11, ifata umwanya wa Gatandatu n’amanota 14.

APR FC ni ikipe yatangiye imikino ya shampiyona nyuma ya yandi kubera ko ubwo yatangiraga, yo yari ihugiye mu mikino ya CAF Champions League, ihagarariye u Rwanda muri iryo rushwanwa rikinwa n’amakipe akomeye kurusha ayandi ku mugabane wa Afrika.

Ubwo yari imaze gusezererwa na Pylamid mu mikino ya CAF Champions League, yagarutse gukina shampiyona y’u Rwanda, ariko isanga andi makipe ageze kure akina, ibyatumye yarakunze kwisanga mu myanya y’inyuma ku rutonde rwa shampiyona y’u Rwanda kubera yo itarakina imikino ingana n’iyo andi makipe yakinnye.

Ubwo ikipea ya APR FC yagarukaga muri shampiyona y’u Rwanda, yatangiye nabi cyane, kuko bwa mbere yatsikiye ku mukino wa Etincelles ubwo banganyaga ubusa ku busa. Uretse gutsikira ku ikipe ya Etincelles, APR yananiwe  Rutsiro FC, ndetse na Nyuma yo kunganya na Gorilla FC yakoze amakosa akomeye yo guhuriza abanyamahanga barindwi mu kibuga, ibyatumye ihanishwa mpaga y’igitego bitatu ku busa.

Nyuma yo kudahirwa n’iyo mikino, APR FC wasangaga abakinnyi biganjemo abo yaguze bo kuyifasha muri uyu mwaka w’imikino bafite urwego ruri hasi, ikipe ikanengwa kuba itarashishoje neza mu kugura abakinnyi, cyangwa ikaba yarabeshywe cyane ku isoko ry’igura n’igurisha.

Nyuma yo gutsinda ikipe ya Muhazi United igitego kimwe ku busa, Gen.Mubarakh Muganga yasabye abakinnyi ba APR FC kureka gutsinda igitego kimwe gusa, ibintu bubahirije ubwo batsindaga Bugesera FC ibitego bibiri ku busa.

Kugeza ubu ikipe ya APR FC imaze gukina imikino irindwi mu mikino 10 imaze gukinwa muri shampiyona y’u Rwanda. Mu mikino 7, imaze gukina, ubu ni iya Gatandatu ifite amanota 14. Mu gihe yakomeza gutsinda imikino yayo, ikanatsinda ikirarane ifitanye na Rayon Sports imibare igaragaza ko yamara gukina ibirarane byayo ifite amanota 23  angana n’ayo Rayon Sports ifite kugeza ubu

Uretse kuba APR FC ikomereje kuri uyu mujyo yanganya amanota na Rayon Sports iri mu byishyimo bikomeye cyane, kuko iri kugira ibisubizo byinshi mu kibuga, kuko na bamwe mu bakinnyi batabonaga umwanya wo gukina bamaze kuzamura urwego ndetse bakaba bakomeje kuyifasha kwitwara neza umunsi ku munsi.

Ku mukino w’umunsi wa 11 wa shampiyona y’u Rwanda, APR FC izacakirana na AS Kigali umukino uteganyijwe ku itariki ya Mbere Ukuboza.

Ikipe ya APR FC uko iri kugenda ikura mu nzira ibirarane byayo, inasatira imyanya myiza