Basketball: REG WBBC iri kwitegura bidasanzwe imikino nyafurika

Imikino Nyafurika y’Abagore (Africa Women’s Basketball League, AWBL) izabera mu murwa mukuru wa Sénégal, Dakar, hagati ya tariki ya 6 na 15 Ukuboza 2024. U Rwanda ruzaba ruhagarariwe n’amakipe abiri ariyo REG WBBC na APR WBBC.

Aminata Ly, umwe mu bakinnyi bashya ba REG WBBC, asanzwe akinira Fordham University muri Leta Zunze Ubumwe za Amerika ndetse n’Ikipe y’Igihugu ya Sénégal.

Uyu mukinnyi yanagize uruhare rukomeye mu gutwara umudali wa zahabu mu mikino y’Ibihugu bikoresha Igifaransa yabereye i Kinshasa mu 2023.

Ku rundi ruhande, REG WBBC yagaruye Nezerwa Ines, uzwi ku izina rya Giti, wari warayikiniye mu myaka yashize. Uyu mukinnyi w’imyaka 31 akinira Association Sportive de Villeurbanne Éveil Lyonnais yo mu Bufaransa mu Cyiciro cya Mbere cya Basketball yaho.

Nubwo iyi kipe yakomeje gushakisha imbaraga nshya, yatakaje umukinnyi Kristina King, wagize uruhare runini mu kuyifasha kugera ku rwego ruhebuje mu myaka ishize.

Imikino ya AWBL izahuza amakipe yitwaye neza mu bice byayo, aho Zone V u Rwanda rubarizwamo yahagarariwe n’amakipe atatu ariyo Al Ahly (Misiri), REG WBBC na APR WBBC.

Andi makipe azitabira arimo AS Ville Dakar (Sénégal), Sporting Alexandria (Misiri), Mountain of Fire & Miracles (Nigeria), Friend’s Basketball Association (Côte d’Ivoire), ASB Makomeno na CNSS (RDC), Ferroviario Maputo (Mozambique), FAP (Cameroun), na Nigeria Customs (Nigeria).

REG WBBC irimo gushyira imbaraga nyinshi mu kwitegura neza aya marushanwa akomeye, yizeye kuzitwara neza no guhagararira neza igihugu.

Ines wamamaye nka Giti yasubiye muri REG WBBC

REG WBC yamanukanye igikurankota giturutse muri Senegal, Aminata Ly