Ruben Amorim yakoresheje imyitozo ya mbere muri Man United

Amorim, umutoza w’Umunya-Portugal uzwiho kuzamura impano n’imyitwarire idasanzwe mu gukorana n’abakinnyi, yari kumwe n’abakinnyi bake bari babashije kwitabira imyitozo kubera ko abandi bakomeje imikino mpuzamahanga. Nubwo abakinnyi 10 gusa ba Manchester United bo mu ikipe ya mbere ari bo bitabiriye, uyu mutoza yakoze imyitozo itanga icyizere.

Mu myitozo ya mbere ya Ruben, hari ibyishimo byinshi kubera kugaruka kw’abakinnyi bari baravunitse, harimo nka Kobbie Mainoo: Uyu musore w’imyaka 18 ari kugaruka mu kibuga nyuma y’imvune yagize mu kwezi kwa 10. Amad Diallo,  nyuma y’imvune yagiriye mu mukino na Leicester City, Luke Shaw na Tyrell Malacia nabo bari bahari nyuma y’igijhe kirenga umwaka badakina kubera imvune na Leny Yoro umwe mu bakinnyi bato bitezweho kuzamura urwego rwa Manchester United mu minsi iri imbere.

Abandi bakinnyi nka Lisandro Martinez na Victor Lindelof na bo bari i Carrington aho barimo gukorerwa isuzuma n’ubuvuzi nyuma yo kuva mu makipe y’ibihugu byabo bareba ko bagarutse ari bataraga.

Kubera umubare muto w’abakinnyi bakina mu ikipe nkuru, imyitozo yongewemo abakinnyi bavuye mu ishuri rya Manchester United. Uyu mwanzuro wagaragaje ko Amorim azakomeza umuco wo kuzamura impano nshya muri iyi kipe ifite amateka akomeye yo kwibanda ku bakiri bato.

Umukino wa mbere wa Amorim uzaba ku Cyumweru, ubwo Manchester United izaba isura Ipswich Town ku kibuga cya Portman Road. Ni umukino ufite byinshi uvuze, aho abafana n’abasesenguzi bashaka kubona uburyo uyu mutoza azazana impinduka kuri Manchester United.

Uru rugendo rwa Amorim ntiruzaba rworoshye, ariko uburyo yagaragaje ubushake bwo gukorana n’abakinnyi bose ku buryo bungana, bigaragaza ko afite intego yo guhindura isura y’iyi kipe ikomeye.

Ese Rúben Amorim azahesha Manchester United ikuzo nk’uko byitezwe?

Iki ni ikibazo abakunzi b’umupira w’amaguru hirya no hino ku Isi bakomeje kwibaza. Ikipe yose izahurira hamwe mu mpera z’iki Cyumweru, umutoza ahabwe amahirwe yo gukora imyitozo ku buryo bwuzuye mbere y’uko akina umuikino we wa mbere atoza Amashitani Atukura.

Ruben Amorim utegerejwe ku Cyumweru akina na Ipswich City yakoze imyitozo ya mbere muri Man United