Diyama ya kabiri nini ku Isi yavumbuwe muri Botswana

Diyama nini ya karat 2,492, imwe mu nini cyane zigeze kuvumburwa ku isi yacukuwe mu kirombe cyo mu gihugu cya Botswana. Ubunini bwayo, buyigira diyama iya kabiri ku isi nyuma ya diyama ya karat 3,106 yitwa Cullinan yavumbuwe muri Afurika y'Epfo mu 1905.

Botswana iri mu bihugu bya mbere bitanga diyama ku isi. Mu 2023, ibirombe byo muri iki gihugu byinjije miliyari 3.28 z'amadolari bizikuye muri diyama.

Lucara Diamond Corp. yatangaje ko iri buye ryavumbuwe hifashishijwe ikoranabuhanga rya X-ray mu kirombe bya Karowe, ryagenewe gutahura amabuye y'agaciro.

Iyi diyama yavumbuwe nyuma y'izindi diyama ebyiri zikomeye zacukuwe muri iki kirombe arizo; Sewelo ya karat 1.758 na Lesedi La Rona ya karat 1,109.

Umuyobozi mukuru w'ikirombe cya Lucara, William Lamb yagize ati: "Ubushobozi bwo kuvumvura iri buye ry'agaciro riri mu rwego rwo hejuru bwerekana neza ubuhanga bwacu mu kuvumbura diyama."

Ubu buvumbuzi bubayeho mu gihe kitoroshye ku ruganda rwa diyama, kuko ibiciro bimaze imyaka ine bigabanyutse. By'umwihariko, isoko rya diyama muri Botswana ryibasiwe cyane n'iri gabanuka ku kigero cya 49%.

Ibuye rya diyama [Diamond] rinini ku Isi ryavumbuwe muri Afurika y'Epfo mu 1905 rigahabwa ubwami bw’u Bwongereza. Iri buye, rizwi nk’Inyenyeri ya Afurika ripima carats 3100, ni ukuvuga garama 620.

Agace kamwe gapima garama 106 ubu kari mu ikamba umwani Charles III aherutse kwambikwa mu gihe cyo kwima ingoma.