Mu kwezi kumwe gusa, ibyamamare nyarwanda bisaga 6 byakoze ubukwe - AMAFOTO Y'UBUKWE

Muri iyi minsi isaga ukwezi kumwe gusa, Inyarwanda.com ikaba yongeye kubakusanyiriza ubukwe bw’ibyamamare byaranze uku kwezi ndetse n’amafoto y’uko byari byifashe mu birori by’ubukwe bwabo, mu gihe ubu benshi muri bo bakiri mu kwezi kwa buki. Muri aba harimo abanyamakuru ndetse n’abahanzi mu ngeri zitandukanye.

1. Umunyamakuru Rukizangabo Shami Aloys na Gahima Chantal

Umunyamakuru Rukizangabo Shami Aloys wamenyekanye cyane mu biganiro by’umuco n’igitaramo kuri Radiyo Salus akaza gukomereza aka kazi kuri Radiyo y’igihugu, yambikanye impeta n'umukunzi we Gahima Uwimana Chantal bari bamaranye imyaka ine bakundana, ibirori by'ubukwe bwabo bikaba byarabaye ku itariki 26 Nyakanga 2014.

Rukizangabo Shami Aloys yambikanye impeta n'umukunzi we Gahima Chantal

Ibyishimo byatashye inshuti n'abavandimwe ku munsi w'ubukwe bwabo

Ubu Rukizangabo Shami Aloys ni umugabo wa Gahima Uwimana Chantal

2. Umunyamakuru Kim Kizito na Umugwaneza Liliane

Kuwa Gatandatu tariki ya 26 Nyakanga 2014, nibwo ubukwe bw’umunyamakuru akaba n’umuhanzi Safari Kim Kizito n’umukunzi we Umugwaneza Joie Liliane bwatashye, mu birori byari bibereye ijisho bakaba barabashije gusezerana imbere y’Imana, maze urugo rushya rwakira abari baje kwifatanya nabo mu busitani bwa Croix rouge ku Kacyiru mu mujyi wa Kigali. Ni nyuma y’uko mu minsi yashize tariki ya 29 Gicurasi 2014 bari basezeranye imbere y’amategeko ya Repubulika y’u Rwanda naho tariki ya 19 Nyakanga akaba aribwo habaye imihango yo gusaba no gukwa yabereye ku Gisozi.

Safari Kim Kizito n'umukunzi we bagaragaje ibyishimo byinshi ku munsi w'ubukwe bwabo

3. Miss Shanel na Guillaume Favier

Ku itariki ya 2 Kanama 2014 nibwo umuhanzikazi Nirere Ruth uzwi ku izina rya Miss Shanel yambikanye impeta n’umufaransa Guillaume Favier, ubukwe bwabo bukaba bwarabereye i Paris mu gihugu cy’u Bufaransa ariko nyuma y’uko bamaze gusezerana kubana nk’umugore n’umugabo, ubu bakaba bateganya kuzaza kwiyereka inshuti n’umuryango mu Rwanda mu minsi ya vuba, dore ko abanyarwanda babashije kubutaha ari mbarwa.

Ubukwe bwa Miss Shanel n'umufaransa Guillaume bwaranzwe n'ibyishimo n'ubwo abanyarwanda babwitabiriye bari bacye

4. Yvonne wo mu ikinamico urunana na Henri Jado Uwihanganye

Mukasekuru Pacifique wamamaye cyane mu ikinamico urunana ku izina rya Yvonne, tariki 16 Kamana 2014 yasezeranye kubana akaramata na Henri Jado Uwihanganye; uyu akaba yaramenyekanye cyane nk’umunyamakuru mu biganiro by’imyidagaduro kuri Radio Salus nyuma aza no kujya kuri Radio 10 ari naho yavuye ajya kwiga ibijyanye n’ubwubatsi kugeza ubu akaba ari byo akora.

Henri Jado Uwihanganye yabanje gusaba no gukwa Pacifique uzwi nka Yvonne mu ikinamico Urunana

Imbere y'Imana, Henri Jado na Pacifique bemeye kuzabana akaramata

Henri Jado Uwihanganye na Pacifique uzwi nka Yvonne mu ikinamico Urunana bagize ubukwe bwarimo udushya twinshi

5. Ben Kayiranga na Uwizeye Josephine (Fifi)

Umuhanzi Ben Kayiranga, ku itariki 27 Kanama 2014 yasabye ndetse anakwa Uwizeye Josephine bakunze kwita Fifi, mu birori by’igitangaza byaranzwe n’udushya twinshi dutandukanye uyu mugabo akaba yararenzwe n’ibyishimo maze amarira ashoka ku maso, ibintu byakomeje kugarukwaho n’abantu benshi bemeza ko Ben Kayiranga akunda umukunzi we cyane. Ibi byabaye nyuma y’aho ku itariki 18 Nyakanga bari basezeranye imbere y’amategeko, hanyuma bikaba binateganyijwe ko mu mpera z’uyu mwaka bazasezerana imbere y’Imana, ibirori bizabera mu Bufaransa ari naho Ben Kayiranga asanzwe aba ndetse n’uyu mugore we akaba yaramaze kubona ibyangombwa bimwemerera kuba umuturage w’u Bufaransa.

Aha Ben Kayiranga yari amaze kugera mu byicaro by'abageni ategereje ko bamushyikiriza umukunzi we Fifi

Aba babanje kuza gutegurira inzira Fifi mbere y'uko agera imbere y'imbaga y'abashyitsi n'abasangwa

Abari bagaragiye Ben Kayiranga nabo bari bamuri hafi bategereje ko ashyikirizwa umukunzi we

Itorero Intayoberana ryari ryabukereye ngo riserukane n'umugeni

Ibyishimo byari byose Ben amaze gushyikirizwa umukunzi we ndetse agahita anamwambika impeta

Ben Kayiranga yasabye anakwa umukunzi we Fifi nyuma yo gusezerana nawe imbere y'amategeko

6. Producer Nicolas na Ineza Melisa

Ku cyumweru tariki 24 Kanama 2014 nibwo Producer Nicolas wamenyekanye cyane kubera akazi akora ko gutunganyiriza abahanzi indirimbo, yasezeranye n’umukunzi we Ineza Melisa mu birori by’akataraboneka byaranzwe n’imyidagaduro nyuma yo gusezerana imbere y’Imana, imihango yabereye i Kibagabaga mu mujyi wa Kigali.

Procer Nicolas n'umukunzi we Melisa beretse ibirori ababyeyi

Urugo rushya rwaranasengewe

Nicolas na Melisa basezeranye kubana akaramata

Mu mpano bahawe harimo na Bibiliya

Nyuma y’imihango yo gusezeranya aba bombi, abageni bataramiwe n’abahanzi batandukanye basanzwe ari inshuti za Nicolas bari batashye ubu bukwe barimo King James, Tom Close, Christopher, Patient Bizimana, Uwimana Aimee,Eric Mucyo n’abandi benshi.

Tom Close yaririmbiye abageni

Uncle Austin aririmbira abageni

Eric Mucyo nawe yaririmbiye abageni

Umuhanzi Christopher nawe yaririmbiye Nicolas na Melisa

Umuhanzi Patient Bizimana aririmbira abageni

Jules Sentore, Khizz, producer David na Peace nabo bari bitabiriye ubu bukwe baje gushyigikira mugenzi wabo

Uncle Austin yicaye imbere y'abageni

Gabby Kamanzi nawe yari yabutashye

Producer Nicolas n'umukunzi we Ineza Melisa bagize ubukwe bw'igitangaza, ibyishimo n'umunezero byari byose ku bageni, imiryango n'inshuti zatashye ubu bukwe

Manirakiza Théogène