Ku mugoroba wo kuri uyu wa Gatatu tariki 20 Mata 2016, imikino ya shampiyona mu bihugu bitandukanye by’i Burayi yari yakomeje, muri shampiyona yo muri Espagne ari naho kugeza ubu bigikomeye kuko igikombe kitarabona nyiracyo, amakipe ahabwa amahirwe akaba yose yatsinze.
Mu gihugu cya Espagne, shampiyona yaho iracyakomeye cyane kuko bitarasobanuka hagati y’amakipe atatu agifite amahirwe yo kuba yakwegukana igikombe, ibi bikaba ari nabyo byatumye imikino aya makipe yaraye akinnye yose yari ihanzwe amaso mu buryo buhambaye. By’umwihariko ku ikipe ya FC Barcelona imaze imikino myinshi itsindwa, wari umukino abafana bayo bari bahanze amaso kuko kongera gutsindwa byari guhita biyigabanyiriza amahirwe yo kuba yazegukana igikombe.
FC Barcelona yabashije kubyitwaramo neza ibifashijwemo na Suarez
FC Barcelona yabashije gutsindira Deportivo iwayo, iyinyagira ibitego 8 byose ku busa, muri ibi hakaba harimo 4 byose byatsinzwe na Luis Suarez, naho Messi na Neymar nabo buri wese abonamo igitego kimwe, ibindi bibiri bitsindwa na Ivan Rakitic ndetse na Marc Bartra. Andi makipe arwanira igikombe nayo yabashije kubyitwaramo neza, kuko Atletico Madrid yari yasuye Athletic Bilbao yabashije gutsinda 1 ku busa, naho Real Madrid yari yakiriye Villarreal ibasha kuyitsinda ibitego 3 ku busa byatsinzwe na Benzema, Luka Modric na Lucas Vazquez.
Neymar utaherukaga gutsinda nawe yabashije kubona igitego cye muri uyu mukino
Gutsinda byinshi kwa Barcelona n’ubundi byayifashije kuguma ku mwanya wa mbere n’amanota 76, ikanganya amanota na Atletico Madrid ariko yo ikaba izigamye ibitego 67 mu gihe Atletico izigamye 42, Real Madrid ikaza ku mwanya wa gatatu n’amanota 75 ariko ikaba izigamye ibitego 71 byose, bivuga ko iyo byanganya amanota yahita iyicaho.
Luis Suarez kandi wabashije gutsinda ibitego 4, yabashije kwegera cyane Cristiano Ronaldo ku rutonde rw’abahatanira urukweto rwa zahabu ruhabwa umukinnyi watsinze ibitego byinshi, kuko ubu Cristiano wa mbere afite ibitego 31, Suarez wa kabiri akagira ibitego 30, mu gihe ku mwanya wa gatatu haza Lionel Messi n’ibitego 24, uwa kane akaba Karim Benzema n’ibitego bye 23.
Eng
RSS 
TANGA IGITECYEREZO