Umwirabura wa mbere wasifuye muri Premier League yavuze uko yamugaye mu buryo butunguranye

Uyu mugabo w’imyaka 65 wari uzwiho imbaraga nyinshi no kuba impuguke mu mikino njyarugamba (martial arts), yamaze amezi atanu mu bitaro nyuma y’uko indwara yamutunguye ubwo yari mu biruhuko muri Turukiya.

Yabwiye BBc ko ubwo yari mu biruhuko, Rennie yatangiye kumva ububabare bukaze mu mugongo. Yagize ati: “Natekerezaga ko naryamye nabi ku buriri bwo ku mucanga. Nari niteguye kujya kuguruka mu kirere (paragliding), ariko kubera ububabare sinabashije kujyayo.”

Ibintu byaje gukara birushijeho ubwo uburibwe bwiyongeraga, ku buryo ageze mu Bwongereza atakibasha kugenda.

Nyuma yo gusuzumwa, abaganga basanze afite ikibazo gikomeye cy’ubwonko cyatewe n’akantu gato (nodule) kari karemereye umutsi wo mu mugongo. Kubera ko ari indwara idakunze kubaho, ntibyashobotse ko bamubaga, bityo akaba yariyemeje kwiga kongera gukoresha amaguru ye kuko no kugenda bitamworoheye.

Rennie ashobora guhaguruka akoresheje igikoresho kimufasha, ndetse arakora imyitozo myinshi kugira ngo abashe kongera kwigenza. Ati: “Ndakomeza gukora imyitozo buri munsi. Ubu nshobora guhagarara mfashijwe n’icyuma, kandi amaguru yanjye aragenda agira ingufu.”

Nubwo iyi ndwara yamugizeho ingaruka zikomeye, Rennie ntiyacitse intege. Ubu ashobora guhaguruka agashigikirwa n’icyuma gifashe ku kagare k’abafite ubumuga. Yavuze ko nubwo bigoye, akomeje imyitozo myinshi kugira ngo abashe kongera kugenda uko bisanzwe.

Rennie amaze imyaka myinshi akora ibikorwa byo guteza imbere uburinganire muri siporo, gufasha abantu bafite ibibazo by’ubuzima bwo mu mutwe, no gufasha abatishoboye. Yari agiye gutangira akazi nk’umuyobozi wa Sheffield Hallam University, ariko iyi ndwara ntiyamubujije gukomeza kugira uruhare mu bikorwa byo guteza imbere siporo.

Yagize ati: “Nari narahisemo gukora impinduka ku muryango mugari w’i Sheffield. Nubwo nari mu bitaro, nakomeje gutanga ibitekerezo no kuyobora amatsinda atandukanye y’imikino nubwo nari mu buriri.”

Mu 2023, yahawe impamyabumenyi y’ikirenga (honorary doctorate) na kaminuza ya Sheffield Hallam kubera uruhare rwe mu guteza imbere siporo n’imibereho myiza y’abaturage.

Nubwo nta muganga n’umwe wamubwiye ko atazongera kugenda, Rennie yavuze ko n’iyo babimubwira atari kubireka.

"Ntabwo ari njye wa mbere uri mu kagare k’abafite ubumuga, ariko ntibishatse kuvuga ko ari byo bingenewe. Iki kibazo cyanyigishije byinshi, cyanyeretse uko ubuzima bushobora guhinduka vuba."

Yakomeje avuga ko agiye gukomeza gukora uko ashoboye kugira ngo agaruke ku buzima busanzwe: "Ntabwo nzi niba nzongera kugenda neza, ariko nzi neza ibyo ngomba gukora kugira ngo ngerageze. Ntugomba na rimwe gucika intege."

Uyu mugabo ukomoka muri Jamaica ariko akaba yarakuriye mu Bwongereza, yagaragaje ko kuba yarabaye umusifuzi wa mbere w’umwirabura ari intambwe ikomeye. Yashimangiye ko aharanira gushyira abandi ku rundi rwego kugira ngo na bo bazagirire umumaro sosiyete.

Nubwo yahindutse umuntu utagishobora kugenda nk’uko byahoze, Rennie ntiyemera ko ibi bimugira umunyantege nke. Yagize ati: “Hari abantu benshi baba mu tugare k’abafite ubumuga, ariko ntabwo aribyo bibaranga. Iki kibazo cyatumye ndushaho kugira imbaraga, kandi sinzigera nshika intege.”

Rennie yavuze ko uburwayi bwamutunguye ari mu biruhuko muri Turkey

Rennie niwe mwirabura wa mbere wasifuye shampiyona y'u Bwongereza