Travis Scott azagaragara ku mwambaro wa FC Barcelona mu mukino ukomeye wa El Clasico

Ni ku nshuro ya gatandatu iyi kipe ikomeye yo muri Espagne igiye gukorana n’umuhanzi w’icyamamare mu rwego rwo guteza imbere ubufatanye ifitanye na Spotify, umuterankunga wayo mukuru kuva mu 2022.

Uyu mukino uzabera kuri Stade Estadi Olímpic Lluís Companys i Montjuïc, aho Travis Scott azaba akurikiye abandi bahanzi nka Drake, Rosalía, Coldplay, Karol G, na The Rolling Stones bose bamaze kugaragara ku myambaro ya Barça mu mikino nk’iyi.

Travis Scott, w’imyaka 33 y’amavuko, akomoka muri Houston muri Leta Zunze Ubumwe za Amerika. Afite izina rikomeye ku isi kubera ibihangano bye bigezweho, bikaba bimaze kumuhesha abakunzi barenga 68 miliyoni bamukurikirana buri kwezi kuri Spotify. 

Uyu muhanzi ari mu bahanzi 10 ba mbere bumvwa cyane ku rubuga rwa Spotify, aho ahanganye n’ibyamamare nka Taylor Swift, The Weeknd na Bad Bunny.

Spotify, binyuze muri ubu bufatanye, igamije kuzamura umubano w’umuziki n’umupira w’amaguru, aho buri mukino wa El Clasico uba ari umwanya mwiza wo kumenyekanisha abahanzi batandukanye binyuze ku mwambaro wa FC Barcelona.

Mu gihe Barcelona iri imbere ya Real Madrid n’amanota 4 ku rutonde rwa shampiyona, uyu mukino uzaba ufite akamaro kanini mu rugamba rwo gushaka igikombe cya La Liga.

Travis Scott azagaragara ku mwambaro FC Barcelona izacakiranamo na Real Madrid yambaye