Hapfiriyemo abatunzi, abahanga n'abayobozi: Ibyamamare byaguye mu mpanuka ya Titanic, n’abayirokotse bagahinduka ibyamamare

Uburyo Titanic yarohamyemo bwabaye isomo rikomeye ku bijyanye n’umutekano wo mu mazi. Ariko ibirenze ibyo, ni inkuru y’ubuzima, urukundo, ubwitange, ubutwari n’agahinda. Abayipfiyemo benshi bari bafite inzozi, ibitekerezo, ubukire n’icyerekezo. Abayirokotse basigaye bavuga inkuru zashushanyaga ubuzima bwo mu gihe cyabo.

Ubwato bwa RMS Titanic bwararohamye mu Nyanja nini ya Atlantic y’Amajyaruguru, ahagana saa munani n’iminota makumyabiri z’urukerera ugendeye ku isaha ngengamasaha GMT. Icyo gihe, ubu bwato bwagonze urubura rwo mu mazi(Iceberg), abantu bagera ku 1517 mu bantu 2240 bari baburimo bahasize ubuzima.

Ubu bwato bwari bwahagurutse tariki ya 10 Mata 1912 mu gihugu cy’Ubwongereza mu mujyi wa Southampton bwerekeza i New York muri Leta Zunze Ubumwe za Amerika butwawe na Captain Edward J.Smith; bwari burimo utwato duto tuzwi mu rurimi rw’icyongereza nka Tenders twifashishijwe mu kurokora abantu bake.

Gusa ijoro ryo ku Cyumweru tariki 14 Mata 1912, ntiryabaye rihire ku bantu bari muri ubu bwato, aho igipimo cy’ubushyuhe cyari cyamanutse hafi kuba zero, inyanja yari ituje, ndetse ukwezi kutagaragara, ikirere na cyo cyari gikeye. Nyuma yaho nibwo impanuka yabaye, ihitana imbaga y’abantu.

Impanuka ya Titanic yasize igikomere ku mitima ya benshi ku isi, bitewe n’ubwinshi bw’abantu bapfiriye icyarimwe n’ubushobozi buke bwo gutabara bwari buhari. Ubwo bwato bwari bugezweho cyane mu bwiza n'ikoranabuhanga, burimo ibyumba by’akataraboneka, bugendamo abakire, abanyacyubahiro, n’abahanzi.

Ariko icyagaragaye ni uko ubutunzi n’icyubahiro byose byabaye ubusa imbere y’urupfu: bamwe bapfuye barwana no kurokoka, abandi batanga ubuzima bwabo ngo barengere abandi. Titanic yasize isomo rikomeye ku bijyanye n’umutekano w'ubwikorezi bwo mu mazi.

Iyi mpanuka, yaguyemo ibyamamare byari bizwi ku isi yose muri icyo gihe, harimo abari abakire, abahanga, n'abandi bantu bari bafite amateka atangaje. Ku rundi ruhande ariko, hari n’abandi bantu 11 babashije kurokoka, nyuma yaho bavamo ibyamamare bikomeye mu nzego zitandukanye.

Abantu 12 b’ibyamamare bapfiriye mu mpanuka y’ubwato bwa Titanic

1. John Jacob Astor IV

Ni we warutunze byinshi kurusha abandi bari hamwe muri Titanic. Yari umuherwe w’umunyamerika, nyiri za hoteli, imitungo itimukanwa n’ibindi. Yari kumwe n’umugore we muto cyane, Madeleine, wari utwite inda y’amezi 5. Yamushyize muri bwa bwato buto bwabashije kurokora abantu bake, abasha kurokoka. John Jacob yitabye Imana afite imyaka 47 y'amavuko.

2. Benjamin Guggenheim

Umuherwe wakomokaga mu muryango w’Abayahudi wari ukize cyane. Yagize uruhare rukomeye mu bucuruzi bwa zahabu n’imyambaro. Yanze kujya mu bwato bwarokoye bamwe, ahitamo kwambara imyenda ye myiza agira ati: “Turapfa nk’abagabo.”

3. Isidor Straus

Nyiri iduka rya Macy’s ryo muri New York. We n’umugore we Ida banze gutandukana. Ida yanze kwinjira mu bwato bwagombaga kumurokora ngo atandukanye n’umugabo we, bombi bapfira hamwe.

4. Major Archibald Butt

Umusirikare w’umunyamerika wabaye umujyanama w’Abaperezida b’Amerika batandukanye barimo William Taft na Theodore Roosevelt. Yavuzweho ko yagiye afasha abagore n’abana kujya mu bwato bwo kubarokora, kugeza ku munota wa nyuma.

5. Thomas Andrews

Umuhanga mu bwubatsi bw’amato akaba ari we wari ushinzwe imyubakire ya Titanic. Yari mu rugendo rwo kureba uko ikora. Yakoze ibishoboka byose ngo afashe abantu, arangije asigara ku bwato kugeza ubwo burohama.

6. William Thomas Stead

Umwanditsi w’ibitabo w’Umunyabritaniya, wamamaye cyane mu itangazamakuru ryo mu kinyejana cya 19. Yakundaga kwandika ku bintu by’abazimu n’ubuhanuzi. Hari ubwo yavuze ko azapfira mu bwato, ndetse yanditse inkuru isa neza n'iya Titanic mbere hose.

7. Henry B. Harris

Yari umuyobozi ukomeye mu bijyanye n’ikinamico muri Broadway. Yashyize umugore we muri 'lifeboat,' we asigara ku bwato ararohama. Uyu mugore we yarokotse.

8. Edward Austin Kent

Umwubatsi ukomeye w’inyubako zo muri Buffalo, New York. Yagaragaye afasha abagore kujya mu bwato buto agamije kubarokora. Umubiri we wabonetse nyuma, ku kiraro cya Titanic.

9. George Dunton Widener

Umukire w’umunya-Philadelphia, wari mu rugendo n’umugore we ndetse n’umuhungu wabo. Umugore we yarokotse, we n’umuhungu we bahasiga ubuzima.

10. John Thayer

Umunyamabanga mukuru w’uruganda rwa gari ya moshi muri Amerika. Yapfanye n’umugore we n’abandi bari bagize umuryango we. Umuhungu we, Jack Thayer, ni we warokotse.

11. Frederick Maxfield Hoyt

Umujyanama mu bijyanye n’imari, wamamaye cyane mu bashoramari bo muri Amerika. Yari afatanyije urugendo na Guggenheim.

12. Jacques Futrelle

Umwanditsi w’ibitabo w’Umufaransa wakundaga kwandika ibijyanye n’ubwiru n’iperereza. Yari kumwe n’umugore we. Umugore we ni we wasigaye atangaza inkuru ye.

Abantu 11 bamenyekanye kubera uko barokotse impanuka ya Titanic

1. Margaret “Molly” Brown

Yamenyekanye cyane kubera ko yitwaye nk'intwari. Yafashije abandi barokotse, ahumuriza abari mu bwato bwo kurokokeramo, ndetse ageze i New York ahita atangiza ibikorwa byo gufasha imiryango yaburiye ababo muri iyo mpanuka.

2. Eva Hart

Yari afite imyaka 7. Nyina yari yarigeze kugira inzozi z'uko Titanic izarohama. Byatumye batajya kuryama nijoro birangira barokotse.

3. Madeleine Astor

Umugore wa John Jacob Astor IV, yari afite imyaka 19 kandi atwite. Umugabo we yamujyanye mu bwato barokokeramo mbere y’uko apfa. Nyuma yaje kwibaruka umwana w’umuhungu.

4. Jack Thayer

Umuhungu wa John Thayer. Yarokotse ubwo yajyaga hejuru y’ubwato buto bwarimo abantu benshi cyane. Yaje kwandika igitabo kuri Titanic.

5. Charlotte Collyer

Umubyeyi w’umwana umwe witwa Marjorie. We n’umwana we bararokotse. Nyuma Charlotte yanditse ubuhamya bwimbitse ku rukundo n’agahinda yanyuzemo.

6. J. Bruce Ismay

Umuyobozi mukuru wa White Star Line, sosiyete yari nyiri Titanic. Yararokotse, ariko yaje kwamaganwa cyane nyuma, benshi bamushinja kwitabara mbere yo gutabara abandi.

7. Elsie Bowerman

Yari umukobwa w’imyaka 22. Nyuma yabaye umwe mu bagore ba mbere bo mu Bwongereza bagize uruhare mu kurwanya ivangura rishingiye ku gitsina.

8. Charles Lightoller

Kapiteni muto wa Titanic. Ni we mu bashinzwe ubwato warokotse. Nyuma yakoze igisirikare mu Ntambara ya Mbere n’iya Kabiri y’Isi.

9. Harold Bride

Yari ashinzwe itangazamakuru mu bwato bwa Titanic. Yakomeje kohereza ubutumwa bwo gusaba ubutabazi kugeza ku munota wa nyuma. Yarokotse afite ibikomere byinshi ariko abaho.

10. Lawrence Beesley

Umwarimu w’ibinyabuzima. Yanditse igitabo kivuga uko yacitse ku icumu, gikundwa cyane n’abakunda amateka ya Titanic.

11. Michel Marcel Navratil

Umwana muto w’Umufaransa warokotse afite imyaka 3, ari kumwe na murumuna we, Edmond. Baje kumenyekana nk’abana b’impfubyi ba Titanic nubwo nyuma baje guhura na nyina.

Impanuka y'ubwato bwa Titanic iri mu zikomeye zabayeho mu bwikorezi bwo mu mazi