Ikipe ya Etincelles FC yandikiye ishyirahamwe ry'umupira w'amaguru mu Rwanda, FERWAFA, isaba kurenganurwa ngo ibone amafaranga yakagombye kuba yarinjije ku mukino baheruka gukinamo na Marine FC.
Ni ibikubiye mu ibaruwa iyi kipe yandikiye FERWAFA nyuma y'umukino bakiriyemo Marine FC ku wa Gatandatu kuri Stade Umuganda mu mukino wo ku munsi wa 22 wa shampiyona y'icyiciro cya mbere mu Rwanda warangiye ari 0-0.
Muri iyi Baruwa Etincelles FC yasabye kurenganurwa igahabwa miliyoni 4 Frw kuko ariyo yagombaga kuba yarinjije.
Yagize iti: "Tubandikiye tugirango tubasabe ko twarenganurwa tugahabwa amafaranga byibuze miriyoni enye (4.000.000 Frw) nk'uko twari turimo kuyateganya ku mukino twakinnye ku munsi wa 22 wa shampiyona dukurikije ubwitabire bw'abafana".
Iyi kipe yavuze ko Stade yari yakubise yuzuye gusa ikaba yaratunguwe no kubona muri system igurishirizwamo amatike harimo miliyoni imwe nk'ibihumbi 300 by'amafaranga y'u Rwanda gusa.
Bati: "Bwana Muyobozi, ku itariki 30/03/2025 ku munsi wa EID FITRI twakiriye Marine ndetse nk'uko muza kubibona ku mashusho y'umugereka w'iyi baruwa Stade Umuganda irakubita iruzura, ariko muri system igurishirizwamo amatike tukaba twarabonye harinjiye amafaranga miriyoni imwe n'ibihumbi magana atatu (1.300.000) yonyine kandi uretse ab atumiwe bake abandi abantu bose binjiye kuri uwo mukino bakaba bari bishyuye".
Etincelles FC yavuze ko system igurishirizwamo amatike hari iminota 30 yamaze itarimo gukora mbere y'umukino ndetse n'abakozi na kompanyi ishinzwe 'scanner' bakaba bari bacye ugereranyije n'abafana bari baje.
Etincelles muri iyi baruwa ivuga ko "iki kibazo campany ya Palmakash igurisha amatike nitagikemura ntabwo tuzemera ko ikora ku mukino w'umunsi wa 23 dufitanye na Kiyovu Sport n'indi mikino tuzakira".
Etincelles FC ivuga ko amafaranga agaragara muri system ari macye kandi abafana bari muri Stade bakaba bari benshi
Eng
RSS 
TANGA IGITECYEREZO