Umwe mu bayobozi bakuru ba U.S. Bank yahitanwe n’impanuka y’indege

Iyo ndege nto yari yanditse mu mazina ye, yari ivuye ku Kibuga cy’Indege Mpuzamahanga cya Des Moines muri Iowa, igana ku Kibuga cy’Indege cya Anoka County-Blaine i Minneapolis.

Nk’uko byatangajwe na CBS News, iyo ndege yaguye ku nzu i Brooklyn Park, ndetse nta n’umwe wabashije kurokoka. Shawn Conway, umuyobozi wa serivisi z’ubutabazi muri Brooklyn Park, yavuze ko kugeza ubu hataramenyekana umubare nyawo w’abantu bari bari muri iyo ndege, ariko nta n’umwe wabashije kurokoka.

U.S. Bank yemeje ko Dolan ashobora kuba yari muri iyo ndege

Mu itangazo ryashyizwe ahagaragara kuri uyu wa Mbere, tariki 31 Werurwe, U.S. Bank yavuze ko nubwo bitaremezwa ku mugaragaro ko Dolan yari muri iyo ndege, bishoboka cyane ko ari we wari uyitwaye.

Iri tangazo riragira riti: "Iyi ndege yahanutse yari yanditse mu izina rya Terry Dolan, umuyobozi wacu wungirije ushinzwe imiyoborere. Kugeza ubu, ibiro by’ubugenzuzi bw’ibizamini by’abapfuye ntibiratangaza niba yari arimo, ariko turizera ko ari we wari uyitwaye." 

Ubuyobozi bw’iyi banki bwagaragaje akababaro bwatewe n’iyi mpanuka, buvuga ko bwifatanyije n’umuryango wa Dolan, inshuti ze, n’abandi bose bababajwe n’iyi mpanuka.

Umuturage yasimbutse urupfu

Serivisi z’ubutabazi zasabye abantu gutabara ahagana saa 12:22 ku munsi iyo mpanuka yabereyeho, nyuma y’uko bimenyekanye ko hari indege yaguye igateza inkongi y’umuriro ku nzu. Muri iyo nzu habagamo abantu babiri, ariko umwe ni we wari urimo ubwo impanuka yabaga. Uwo muturage yabashije kurokoka nta gikomere, nubwo inzu ye yangiritse bikomeye.

Ubushinjacyaha bwa Hennepin ntiburatangaza ku mugaragaro umwirondoro wa nyakwigendera wari utwaye iyo ndege, mu gihe Ikigo cy’Igihugu Gishinzwe Iperereza ku Mpamvu Indege Zakoze Impanuka (NTSB) kikiri mu iperereza kuri iyi mpanuka.

Terry Dolan yakundaga ubukerarugendo bwo mu kirere

Terry Dolan, wari ufite imyaka 63, yari azwi nk’umuntu wakundaga cyane gutwara indege ye. Tim Marx, wahoze ari umuyobozi wa Catholic Charities Twin Cities, yavuze ko iyi nkuru yamushenguye cyane, kuko yari yarakoranye bya hafi na Dolan hagati ya 2012 na 2017 ubwo yari muri komite nyobozi y’icyo kigo.

Marx yabwiye itangazamakuru ati: “Ni inkuru iteye agahinda kandi itunguranye cyane.”

Dolan yari umuyobozi wungirije ushinzwe imiyoborere muri U.S. Bank kuva mu 2023, aho yari yarakoze mu mirimo itandukanye, irimo kuba umuyobozi ushinzwe imari (CFO) ndetse n’umuyobozi mukuru ushinzwe ibikorwa.

NTSB irateganya gushyira ahagaragara icyegeranyo cy’ibanze kuri iyi mpanuka mu byumweru biri imbere.