Elon Musk yateje impaka muri Wisconsin: Inkunga ye ya miliyoni 20$ ishobora guhindura ubucamanza?

Ni ubwa mbere muri aya matora habonetse umutunzi uteye inkunga itubutse kuri uru rwego, ibintu bikomeje kuvugisha abatavuga rumwe na we.

Elon Musk, binyuze mu itsinda rye rya politiki ryitwa America PAC, amaze gutanga miliyoni 20$ mu bikorwa byo kwamamaza Schimel. Mu bikorwa by’inkunga ye, harimo gutanga amafaranga ku baturage ba Wisconsin basinye ku nyandiko zishyigikira uwo mukandida, ibi bikaba byarakuruye impaka nyinshi mu bayobozi batavuga rumwe n’uyu muherwe.

Nk’uko bitangazwa n’inkuru ya AP News, iyi nkunga ya Musk ntigarukira gusa ku kwamamaza, ahubwo ifite intego yo guhindura imiterere y’ubucamanza muri Wisconsin, igihugu gisanzwe gifite ubucamanza bugengwa n’amategeko asanzwe.

Abatavuga rumwe n’Abarepubulikani bavuga ko iyi nkunga ari uburyo bwo kugura ubucamanza no kwemeza ko urukiko ruzajya rufata ibyemezo byorohereza abakire nka Musk. Susan Crawford, umukandida w’Abademokarate, yamaganye inkunga ya Musk, avuga ko ari ikimenyetso cy’uko ubucamanza bushobora gutakarizwa icyizere igihe cyose ba miliyari nka Musk bashobora gutanga amafaranga kugira ngo bagire ijambo mu mikorere yarwo.

Mu nyandiko AP News yashyize ahagaragara, Crawford yagize ati:"Uyu si umutekano w’amategeko, ahubwo ni uburyo bwo kwinjiza amafaranga muri politiki n’ubucamanza kugira ngo bikore ku nyungu za bamwe."

Ku rundi ruhande, Brad Schimel, wahawe inkunga na Musk, yavuze ko abashinja Musk kugerageza kugura ubucamanza ari abo mu ishyaka ry’Abademokarate bafite ubwoba bwo gutsindwa.

Aya matora ni ingenzi cyane kuko ashobora kugena uko Wisconsin izakomeza kugendera ku mategeko. Ni amatora azagena niba urukiko ruzaguma mu maboko y’Abarepubulikani cyangwa niba Abademokarate bazatsinda. Impaka zisumba izindi ziri ku bijyanye n'uburenganzira bwo gukuramo inda, uburenganzira bw'abakozi, ndetse n'uko amatora azajya akorwa muri iyi leta.

Elon Musk akomeje kwerekana ko atari umuherwe usanzwe, ahubwo ari umuntu ushaka kugira uruhare rukomeye muri politiki ya Amerika. Inkunga ye yateje impaka zikomeye, aho bamwe bavuga ko ari uburyo bwo kugura ubucamanza, mu gihe abandi babona ari uburenganzira bwe nka rwiyemezamirimo. Nubwo amatora atari bwabe, inkunga ya Musk yamaze guhindura isura y'iki cyiciro cy’amatora.