Lesotho; Inzira nziza y'Amavubi yo kwiyunga n'Abanyarwanda?

Kuri uyu wa Kabiri saa kumi n'ebyiri ni bwo Amavubi araba yakiriye Lesotho mu mukino wo ku munsi wa 6 wo mu itsinda C mu gushaka itike y'igikombe cy'Isi cya 2026 kizabera muri Mexico, Canada na Leta Zunze Ubumwe z'Amerika.

Ni nyuma y'iminsi micye ikipe y'igihugu itsinzwe na Nigeria muri Stade Amahoro yari yuzuye abafana barenga ibihumbi 45 ibitego 2 bya Victor Osmhen ku busa.

Abanyarwanda batashye bababaye nyuma y'uyu mukino bitewe nuko bari babukereye ari benshi bazi ko Amavubi ari bubahe ibyishimo nk'uko yabigenje ubwaherukaga atsinda Nigeria 2-1, ariko aratsindwa agerekaho no gukina nabi.

Lesotho; inzira nziza y'Amavubi yo kwiyunga n'Abanyarwanda?

Uwabyita amahirwe ko kuba Amavubi agiye gukina na Lesotho kugira ngo abone uko yiyunga n'Abanyarwanda ntabwo yaba abeshye. Ikipe y'igihugu y'u Rwanda ntabwo yakunze guhura na Lesotho inshuro nyinshi kuko bamaze guhura inshuro imwe gusa. 

Bahuye mu kwezi kwa 6 k'umwaka ushize muri iyi mikino yo gushaka itike y'igikombe cy'Isi aho uyu mukino warangiye Amavubi atsinze igitego 1-0 cya Kwizera Jojea ku munota wa 45 ahawe umupira na Fitina Ombolenga.

Ikipe y'igihugu ya Lesotho ntabwo ihagaze neza kugeza ubu kuko ku rutonde rw'impuzamashyirahamwe y'umupira w'amaguru ku Isi, FIFA, iri ku mwanya wa 151 ivuye ku mwanya wa 149. Ni mu gihe Amavubi yo ari ku mwanya wa 129 avuye ku mwanya wa 124.

Umwanya mwiza Lesotho yagize kuri uru rutonde mu mateka yayo ni uwi 105 muri 2014. Umukino uheruka yatsinzwe na Afurika y'Epfo ibitego 2-0 mu gihe iri ku mwanya wa 5 n'amanota 5 aho irusha amanota 2 Zimbabwe iri ku mwanya wa nyuma.

Mu mikino 5 iheruka iyi kipe y'igihugu ya Lesotho yatsinzemo umwe, inganya ibiri naho itsindwa ibiri. Ni mu gihe Amavubi yo mu mikino 5 iheruka yatsinzwe 3 naho itsinda 2.

Ikipe y'igihugu y'u Rwanda ntabwo isabwa gutsinda uyu mukino kugira yiyunge n'Abanyarwanda gusa ahubwo bizayifasha kudakomeza gusigara ku rutonde yari iyoboye mbere y'umunsi wa 4. 

Kuri ubu iri ku mwanya wa 3 n'amanota 7 aho irushwa na Benin iri ku mwanya wa kabiri inota 1 ndetse ikarushwa na Afurika y'Epfo iri ku mwanya wa mbere amanota 3.

Ishyirahamwe ry'umupira w'amaguru mu Rwanda, FERWAFA, ryavuze ko mu rwego rwo gukosora amakosa yakozwe mu bijyanye no kwinjira muri Stade, ku mukino wo ku munsi w'ejo buri mufana waguze itike ya 1000 Frw na 2000 Frw akayinjiriraho cyangwa ntayinjirireho azinjirira ubuntu.

Ni mu gihe uwaguze iza VIP ntayinjirireho nawe azinjiriraho ubuntu. Utaragura itike we ayigura akanze *939*3*1#. Ahasanzwe hejuru ni 1000 Frw, ahasanzwe hasi ni 2,000 Frw,VIP ni 20,000 Frw, Business swite ikaba ari 30,000 Frw,VVIP ni 50,000 Frw, Executive Seat ikaba ari 100,000 Frw naho Sky Box ikaba ari 1,000,000 Frw.

Amavubi arasabwa kwiyunga n'Abanyarwanda atsinda Lesotho 

Umukino uheruka guhuza aya makipe yombi, Amavubi yatsinze 1-0