UEFA Nations League: Portugal,u Bufaransa,u Budage na Espagne zerekeje muri 1/2

Ni nyuma yo kwitwara neza mu mikino yo kwishyura ya 1/4 y'iri rushanwa yakinwe kuri iki Cyumweru. Ikipe y'igihugu ya Portugal yari yaratsinzwe na Denmark 1-0 mu mikino ubanza yari yayakiriye kuri Estádio José Alvalade.

Uyu mukino watangiye Portugal ibona penaliti ku munota wa 6 gusa Cristiano Ronaldo ayitera mu biganza bya Kasper Schmeichel. Ku wa 38 myugariro wa Denmark, Joachim Andersen yaratsinze gusa ku wa 56 Rasmus Kristensen aza kwishyura ku mupira yarahawe na Christian Eriksen.

Ku munota wa 72 Cristiano Ronaldo yakosoye amakosa yari yakoze atsinda igitego cya 2 cya Portugal ariko ntibyatinda Christian Eriksen ahita acyishyura ku munota wa 76.

Ku wa 86 Francisco Trincao wari winjiye mu kibuga asimbuye, yahise atsinda igitego cya 3 cya Portugal, iminota 90 irangira ari 3-2 bituma hitabazwa iminota 30 y'inyongera arinaho Denmark yaje gusezererwa.

Portugal ibifashijwemo na Francisco Trincao na Goncalo Ramos yinjije ibitego 2 ikatisha itike ya 1/2 ku kinyuranyo cy'ibitego 5-3.

Ikipe y'igihugu y'u Bufaransa yari yakiriye Croatia kuri Stade de France mu mukino wo kwishyura nyuma y'uko ubanza wari warangiye itsinzwe 2-0. Byari ugupfa no gukira kuri iyi kipe y'igihugu itozwa na Didier Deschamps gusa birangira yitwaye neza itsinda ibitego 2 bya Michael Olise ku munota wa 52 na Ousmane Dembélé bituma hitabazwa iminota 30 y'inyongera.

Muri iyi minota rwabuze gica haterwa penaliti ari naho ikipe y'igihugu y'u Bufaransa yakomerereje itsinze penariti 5-4 za Croatia.

Kuri Mestalla ikipe y'igihugu ya Espagne yari yakiriye u Buholandi nyuma y'uko amakipe yombi yari yaranganyije umukino ubanza. Kuri uyu mukino Espagne yafunguye amazamu mbere ku munota wa 6 ku gitego cya Mikel Oyarzabal kuri penaliti maze ku wa 54 Memphis Depay aza kukcyishyura nabwo kuri penaliti.

Ku munota wa 67 Mikel Oyarzabal yongeye gutsinda gusa bidatinze ku wa 79 Ian Maatsen arishyura , iminota isanzwe y'umukino irangira ari 0-0 hitabazwa iminota y'inyongera.

Lamine Yamal yaje gufasha Espagne kuyobora ku munota wa 103 atsinda icya 3 gusa ku wa 109 Xavi Simons abisubuza bubisi bituma hitabazwa penaliti.

Kuri penaliti niho ikipe y'igihugu ya Espagne yasezereye u Buholandi aho yinjije 5 naho bwo bukinjiza 4. 

Kuri Signal Iduna Park kandi ikipe y'igihugu y'u Budage yari yakiriye u Butaliyani nyuma y'uko amakipe yombi yari yanganyije umukino ubanza.

U Budage nibwo bwafunguye amazamu mbere ku munota wa 30 ku gitego cya Joshua Kimmich kuri penarliti,ku wa 36 Jamal Musiala atsinda icya 2 naho ku munota wa 45 Tim Kleindienst atsinda icya 3.

Mu gice cya kabiri ikipe y'igihugu y'u Butaliyani yaje irwana no kwishyura maze ku munota wa 49 Moise Kean atsinda icya mbere,ku wa 69 atsinda icya kabiri naho ku munota wa 95 Giacomo Raspadori atsinda icya gatatu umukino uba urangiye ari 3-3.

Iminota 30 y'inyongera ntacyo yamaze hitabazwa penaliti birangira u Budage aribwo bukomeje nyuma yo kwinjiza penaliti 5-4. Muri 1/2 ikipe y'igihugu 'u Budage izakina na Portugal naho Espagne ikine n'u Bufaransa.

Iyi mikino yombi izakinwa tariki ya 4 Kamema 2025.

U Bufaransa bwerekeje muri 1/2:

Cristiano Ronaldo yishimira igitego yatsinze 

Ikipe y'igihugu y'u Budage yasezereye u Butaliyani 

Espagne yasezereye u Buholandi