Abo muri Azerbaijan byaranze! Uko Abakinnyi b'Abanyarwanda bakina hanze bitwaye mu Cyumweru gishize

Duhere muri shampiyona y'icyiciro cya mbere muri Libya mu ikipe ya Al Ahli Tripoli ikinamo Bizimana Djihad na Manzi Thierry ntabwo bakinnye umukino wo ku munsi wa 14 wa shampiyona wagombaga gukinwa mu Cyumweru gishize.

Al Alhli Tripoli izasubira mu kibuga bakina na Al Dhahra ku Cyumweru.

Muri shampiyona y'icyiciro cya mbere muri Tunisia,ku wa Gatanu, ikipe ya Stade de Tunisien ikinamo Mugisha Bonheur yatsindaga Ben Guerdane.

Muri uyu mukino uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. Kugeza ubu Al Ahli Tripoli iri ku mwanya wa 6 ku rutonde rwa shampiyona, ikaba irasubira mu kibuga ikina na JS Omrane kuri uyu wa Mbere Saa Cyenda.

Muri iyi shampiyona kandi ku munsi w'ejo ku Cyumweru ikipe ya Olympic de Beja ikinamo Ishimwe Anicet yatsindwaga na Zarzis igitego 1-0.

Uyu mukinnyi w'Umunyarwanda ntabwo yari yabanje mu kibuga gusa yinjiyemo asimbuye ku munota wa 70.

Kugeza ubu Olympic de Beja iri ku mwanya wa 9 ku rutonde rwa shampiyona, ikaba izasubira mu kibuga ikina na Monastir ku wa Gatandatu.

Muri shampiyona y'icyiciro cya mbere muri Afurika y'Epfo,ku munsi w'ejo ku Cyumweru ikipe ya Kaizer Chiefs ikinamo Ntwari Fiacre yatsindwaga na Mamelodi Sundowns 1-0.

Nk'uko bimaze kumenyerwa ntabwo uyu munyezamu w'Amavubi yari yabanje mu kibuga ndetse nta nubwo yari ku ntebe y'abasimbura.

Kugeza ubu Kaizer Chiefs iri ku mwanya wa 8 ku rutonde rwa shampiyona, ikaba izasubira mu kibuga ikina na Magesi ku munsi w'ejo ku wa Kabiri.

Muri shampiyona y'icyiciro cya mbere mu Misiri ku wa Kane ikipe ya Zed FC ikinamo Rafael York yanganyaga na Zamalek 1-1.

Ntabwo uyu mukinnyi w'Amavubi yakinishijwe muri uyu mukino gusa yari ku ntebe y'abasimbura. Kugeza ubu Zed FC iri ku mwanya wa 10 ku rutonde rwa shampiyona, ikaba izasubira mu kibuga ikina na Ismaily ku munsi w'ejo ku wa Kabiri.

Ku wa Gatanu w'icyumweru gishize, ikipe ya FC Zira ikinamo Mutsinzi Ange yatsindwaga na Araz Naxcivan ibitego 2-0 mu mukino wo kwishyura w'igikombe cy'igihugu ndetse ihita inasezerwa gutyo.

Nk'ibisanzwe uyu myugariro w'Amavubi yari yabanje mu kibuga ikina ndetse nta nubwo yigeze asimbuzwa.

FC Zira izasubira mu kibuga ku munsi w'ejo ku wa Kabiri ikina na Turan muri shampiyona.

Muri iki gikombe kandi ikipe ya Sabail FK ikinamo Nshuti Innocent yo yatsindwaga na Qarabag FK ibitego 3-1 ku wa Kane nayo ihita isezerwa.

Uyu rutahizamu w'Amavubi yari ku ntebe y'abasimbura ariko ntabwo yigeze akoreshwa.

Sabail FK irasubira mu kibuga muri shampiyona ikina na Shamakhi kuri uyu wa Mbere.

Muri shampiyona y'icyiciro cya Kabiri mu Bubiligi,ku wa Gatanu ikipe ya Raal La Louviere ikinamo Samuel Gueulette yatsindaga Eupen ibitego 2-0.

Ntabwo uyu mukinnyi w'Umunyarwanda yabanje mu kibuga gusa yinjiyemo asimbuye ku munota 74. Kugeza ubu Raal La Louviere iri ku mwanya wa 3 ku rutonde rwa shampiyona ikaba izasubira mu kibuga ikina Club Liège ku Cyumweru.

Muri shampiyona y'icyiciro cya mbere mu Bubiligi,ku munsi w'ejo ku Cyumweru ikipe ya Beerschot ikinamo Hakim Sahabo yatsindaga Mechelen 1-0.

Uyu mukinnyi w'ikipe y'igihugu y'u Rwanda, Amavubi yari yabanje mu kibuga ndetse nta nubwo yigeze asimbuzwa. 

Kugeza ubu Beerschot iracyari ku mwanya wa nyuma ku rutonde rwa shampiyona, ikaba izasubira mu kibuga ikina na St Truidense ku wa Gatanu.

Ku wa Kane w'icyumweru gishize ikipe ya Rhode Island ikinamo Kwizera Jojea yanyagiraga Cruise ibitego 6-0 mu mukino wa gicuti utegura shampiyona. Muri ibi bitego harimo icyatsinzwe n'uyu mukinnyi w'Amavubi.

Rhode Island izatangira imikino yayo ya shampiyona ikina na Charleston Battery tariki ya 16 Werurwe 2025.

Mutsinzi Ange n'ikipe ye basezerewe mu gikombe cy'igihugu