Amasezerano y’ihagarikwa ry’intambara muri Gaza arangiriye mu ntugunda

Mu gihe ibi biganiro byari bigamije kurekura imfungwa no kugeza ubufasha ku baturage ba Gaza bari mu bibazo bikomeye, ntibyashoboye gutanga igisubizo kirambye. Aya masezerano yagezweho binyuze mu buhuza bwa Misiri, Qatar na Leta Zunze Ubumwe za Amerika. Mu byari bikubiye muri iki cyiciro cya mbere, abantu 33 b’Abayisraheli bari barafashwe bugwate barekuwe, mu gihe Israel nayo yarekuye imfungwa 2,000 b’Abanyapalestina. Byanatumye ubufasha bw’ibanze bwinjira muri Gaza, ndetse ingabo za Israel zisubira inyuma mu bice bimwe by’iyi ntambara.

Nubwo hari intambwe yatewe, ibiganiro by’icyiciro cya kabiri byahagaritswe, kuko impande zombi zitabashije kumvikana ku buryo bw’ikirenze kwagura aya masezerano. Hamas isaba ihagarikwa ry’intambara burundu ndetse no gukurwamo ibikoresho by’intambara bya Israel, mu gihe Israel yo ishaka gukomeza ibikorwa bya gisirikare kugeza Hamas itsinzwe burundu.

Abahuza b’imishyikirano barashishikariza impande zombi gukomeza ibiganiro kugira ngo habeho ibisubizo birambye. Icyakora, muri Israel, ubuyobozi bwa Minisitiri w’Intebe Benjamin Netanyahu burahanganye n’impaka zikomeye mu nteko ishinga amategeko, aho hari abatavuga rumwe ku cyemezo cyafatwa kuri aya masezerano, nk'uko byatangajwe na AP News.

Mu gihe amasezerano y’ihagarikwa ry’intambara ageze ku musozo, haracyari urujijo ku cyakurikira. Hamas n’abaturage ba Gaza barasaba ko intambara ihagarara burundu, ariko Israel yo ikomeza kwanga gutanga ubwo burenganzira mu buryo bworoshye. Abaturage ba Gaza baracyari mu bibazo bikomeye, bikaba bikomeje gushyira igitutu ku mpande zose kugira ngo habeho igisubizo kirambye cy’iyi ntambara imaze igihe kirekire.

Umwanditsi : Kubwayo Jean de la Croix