Jacques Worshipper yashyize ahagaragara ubutumwa yahawe n'Imana mu nzozi - VIDEO

Indirimbo ‘I Will Exalt You’ imaze amasaha macye igiye ahagaragara, ni indirimbo yo kuramya iri mu rurimi rw’Icyongereza, ikaba imara iminota 11 n’amasegonda 35.

Ubwo yaganiraga na InyaRwanda, Jacques Worshipper yatangaje ko inganzo y’iyi ndirimbo yashibutse mu nzozi, akaba yahisemo kuyishyira hanze iri mu Cyongereza kuko ari rwo rurimi yayihishuriwemo.

Yagize ati: “Inganzo y'iyi ndirimbo yaje ndi mu nzozi nsinziriye ndetse uko yangezeho niko nayanditse; mu rurimi rw'Icyongereza ni rwo yaririmbwemo. 

Ikubiyemo amagambo aboneka muri Bibiliya (Zaburi 145:1, Zaburi 63:1 na Yesaya 4:12) avuga gushima, kuramya no gushyira hejuru izina ry'Imana mu bihe byose yaba ibihe byiza cyangwa ibihe bikomeye. Ni isezerano rikomenye nagiranye n'Imana mu iyerekwa ryo kuyikorera mu buryo butagira umupaka.”

Uyu muramyi yakomeje avuga ko ubutumwa bukubiye muri iyi ndirimbo nshya ari ubugaruka ku kwizera gukomeye no kumenya ko Imana isumba byose, bukaba bugenewe abantu bose, cyane cyane abakunda kuramya no guhimbaza.

Yavuze ko yasohoye iyi ndirimbo muri iki gihe kuko ari igihe abantu bakeneye gukomeza kwizera Imana, kuyiramya no kuyishyira hejuru. Ati: “Kandi ndizera ko ko izabafasha mu rugendo rwabo rwo kuramya Imana bafite ibyiringiro.”

Ni indirimbo yiyambajemo Fidelie na Claudine bahuriye mu mashuri yisumbuye bose bakunda kuramya Imana. Ahamya ko yatekereje gukorana na bo kuko ari abaririmbyi bafite impano kandi bafite ubuhamya bwiza.

Ati: “Nabatekerejeho kuko basanzwe bafite ubunararibonye n’umwete mu kuramya, kandi umwimerere w'ijwi ryabo wari uhuye neza n’iyi ndirimbo.”

Jacques Worshipper yavuze ko umwaka wa 2024 wamusigiye amasomo menshi, kandi ko wamubereye igihe cyo gukura no gukomeza kwagura ivugabutumwa rinyuze mu muziki.

Akomoza kuri gahunda afite muri uyu mwaka, yagize ati: “Mfite intego yo gusohora izindi ndirimbo nshya no gukomeza kwegera abakunzi banjye binyuze mu bihangano bifite ubutumwa bwimbitse.”

Yatangaje ko iyi ndirimbo yamutwaye asaga 750,000 Frw hakubiyemo ayo gutunganya amajwi n’amashusho. Ni indirimbo ya gatatu kuri EP aheruka gusohoraho yise “Arise and Shine”, ikaba yaramaze amezi icumi ikorwa mbere y'uko ijya hanze.

Uyu muramyi avuga ko imbogamizi ahura nazo mu gukora umuziki harimo kuba bihenze, imvune nyinshi, abacantege, gukenera ubundi bushobozi bumufasha gukomeza gukora umuziki, kubura inkunga y’itangazamakuru mu gusakaza ibihangano bye n’ibindi. Gusa nubwo bimeze bityo ntatakaza icyizere ahubwo avuga ko ‘iyo uri kumwe n'Imana byose bishoboka hamwe no kubikunda ndetse no gusenga.’

Imwe mu ntego zikomeye uyu muhanzi afite ni ukwamamaza ubutumwa bwiza, akazana abantu benshi kuri Kristo abinyujije mu ndirimbo zo kuramya no guhimbaza Imana.

Jacques Worshipper yongeyeho ko afite intego yo kuba umuhanzi ukomeye mu Rwanda ndetse no hanze yarwo, abinyujije mu kuririmba mu ndimi zitandukanye, ku buryo azagera ku rwego rusumba bakuru be muri uyu muziki.

Yavuze ko bamwe mu bahanzi bakora umuziki wo kuramya no guhimbaza Imana afatiraho urugero harimo Israel Mbonyi, James na Daniella, Meddy ndetse na Elayone Music.

Jacques Worshipper yasoje asaba abakunzi b’ibihangano bye n’abaramyi muri rusange, gukomeza kumushyigikira, gusakaza ubutumwa bw’iyi ndirimbo nshya no gukomeza kuyikoresha mu bihe byabo byo kuramya Imana, aboneraho no guteguza indi ndirimbo iri gutegurwa izajya ahagaragara vuba, ifite ubutumwa bukomeza imitima y’abayumva.

Uretse indirimbo ‘I Will Exalt You,’ uyu muhanzi afite izindi ndirimbo zirimo iyitwa ‘Arise and Shine,’ Naramwizeye na Tuzahora Duhimbaza.

Ubusanzwe Jacques Worshipper akora umwuga wo kuririmba avuga ko yihebeye mu buzima bwe, akawufatanya n'umurimo w’ubuvuzi, ndetse n'ishuri kuko yakomeje kwiga n'ubundi ibijyanye n'ubuvuzi.

Jacques Worshipper uri mu baramyi batanga icyizere, yashyize hanze indirimbo iri mu Cyongereza

Yavuze ko indirimbo ye nshya yashibutse mu iyerekwa yagize ubwo yari mu nzozi asinziriye

Avuga ko iyi ndirimbo yamutwaye asaga 750,000 Frw

Ni indirimbo yumvikamo ijwi rya Claudine, umuramyi w'umuhanga

Muri iyi ndirimbo nshya humvikanamo na Fidelie

Nyura hano urebe indirimbo "I Will Exault You" yahuje Jacques Worshipper n'abarimo Fidelie & Claudine