Mu Rwanda ubucuruzi bwifashisha murandasi buzagira agaciro ka Miliyoni zirenga 373$ mu 2025

Ubu bushakashatsi bwagaragaje ko hazabaho izamuka risatira 26% hagati ya 2025-2029 ndetse bukazagira agaciro gakabakaba miliyoni 937 z’Amadorari muri iyo myaka.

Mu busanzwe abiyambaza ubu bucuruzi bagaragaza ko buborohereza kubona ibyo bakeneye bitabasabye gukora ingendo. Ni mu gihe kandi abakoresha imbuga zo kuri murandasi zihuza abaguzi n’abacuruzi bemeza ko ikoranabuhanga muri uru rwego ryatumye imitangire ya serivisi yihuta.

Ikigo cy’ubushakashatsi mu ibarurishamire cyo mu Budage, STATISTA cyerekana ko mu Rwanda, ubucuruzi bwifashishije murandasi muri uyu mwaka wa 2025, buzagira agaciro ka miliyoni 373.70 z'Amadorali, naho hagati ya 2025-2029 bukazagira izamuka rya 25.83%.

Mu myaka 5 iri imbere kandi, abagera kuri miliyoni 1 bazaba bitabira isoko ryo kuri murandasi. Ni mu gihe iki cyegeranyo kinagaragaza ko bitarenze 2029, agaciro k’iri soko ryo kuri murandasi kazagera kuri miliyoni 936.80 z’Amadorari.

Mu bijyanye na 'E-commerce,' u Rwanda narwo rwatangiye gusarura kuri iri soko nubwo bizarufata igihe kuko ni urugendo rw'iterambere ruhoraho kandi ubu bucuruzi bwifashisha murandasi, buzaba kimwe mu bigize ubuzima bwa buri munsi bwa muntu. 

Ibi bitangajwe mu gihe mu gihembwe cya 3 cya 2024, icyiciro cy’ikoranabuhanga n'itumanaho cyiyongereyeho 19% ku musaruro mbumbe w’igihugu.

Ikigo STATISTA cyatangaje ko ubucuruzi bwifashisha murandasi mu Rwanda buzagira agaciro ka miliyoni 373.70$ mu 2025