Uwase Sharon 'Jacky' yabatijwe

Jacky yabatirijwe mu itorero rya Elayono Pentecost Blessing Church, biba ikimenyetso cy’uko yemeye Yesu Kirisitu nk’Umwami n’Umukiza.

Yabatirijwe mu mazi menshi ari kumwe n’abandi bayoboke bashya b’itorero rya Elayono Pentecoste Blessing Church riyoborwa na Rev. Prophet Ernest Nyirindekwe.

Ateye iyi ntambwe ikomeye nyuma y’igihe gito atawe muri yombi ku wa 5 Ukuboza 2024, aho yari akurikiranweho gukora ibikorwa by’ibiterasoni mu ruhame no gutangaza amakuru y’urukozasoni hakoreshejwe mudasobwa, gutukana mu ruhame no gushyira ahagaragara amashusho yerekeranye n’imikoreshereze y’ibitsina. 

Ni nyuma y'igihe cyari gishize yihanangirizwa ahanini bitewe n'ibiganiro yagiye akorera ku miyoboro inyuranye ya Youtube avuga ko amagambo y'urukozasoni, ibintu byagiye bituma benshi mu bakoresha imbuga nkoranyambaga bagaragaza ko bidakwiriye. Yari afungiye kuri sitasiyo ya RIB ya Gikondo; ndetse yarekuwe tariki 9 Ukuboza 2024. 

Mu kiganiro na Radio 10, Dr. Murangira yavuze ko bahisemo kurekura Jacky kubera ko "Nta mpamvu twasanze yo kumurikirana afunze. Kuko ibimenyetso by'ibyo yakoze birahari.” Yakomeje avuga ko "No kumushyira hanze (kumurekura) hari ibyo twumvikanye. Agomba kubahiriza."

Dr. Murangira yavuze ko mu ibazwa, babonye ko Jacky "akeneye n'umuganga umufasha mu by'imitekerereze. Ibyo nabyo rero twabyumvikanye hari ibyo azakora.”

“Ngirango ubutabera bugamije no gufasha umuntu (burakenewe). Icyaha kigahanwa, ariko n'umuntu nawe agasanwa, agasubira muri sosiyete, kuko ntawifuza ko umuntu yava muri sosiyete kubera ibyaha."

Jacky yahanwe amaze igihe kinini avugisha benshi ku mbuga nkoranyambaga, aho yatangiye ashyira hanze amafoto yambaye ubusa buri buri, mu 2023. Nyuma yagiye yumvikana mu biganiro avuga amagambo y’urukozasoni.

Uyu mukobwa yavuzwe cyane ku mbuga nkoranyambaga nyuma yo kwambikwa impeta, nyuma akaza kugaruka yandagaza umugabo witwa Stivo bivugwa ko yari yayimwambitse, amuvugaho amagambo akomeye yerekeye amabanga yo mu gitanda.

• Jacky wamamaye mu gutukana no mu kuvuga amagambo y'urukozasoni yabatijwe yakira Yesu Kristo nk'umwami n'Umukiza w'ubugingo bwe