Amad Diallo yafashije Man United kugarura intsinzi zari zararumbye

Ku kibuga cya Old Trafford, Manchester United yari yakiriye Southampton mu mukino w’umunsi wa 21 wa English Premier League. Uyu mukino wari ukomeye, watangiye nabi ku ruhande rwa Manchester United, kuko ku munota wa 43, Manuel Ugarte yitsinze igitego, bituma igice cya mbere kirangira Southampton iyoboye umukino ku gitego 1-0 bwa man United.

Igice cya kabiri cyatangiranye impinduka ku ruhande rwa Manchester United, aho umutoza Ruben Amorim yakoze impinduka agamije kongera ingufu mu kibuga. Kobbie Mainoo, Rasmus Højlund, na Manuel Ugarte basimbuwe na Antony, Jossua Zirkee, na Toby Collyer.

Nubwo aba bakinnyi bashya bagerageje guhindura isura y’umukino, Manchester United yakomeje guhiga igitego ariko biranga. Umutoza Ruben Amorim yongeye gusimbuza akura mu kibuga Noussair Mazraoui na Leny Yoro, abasimbuza Christian Eriksen na Harry Maguire.

Ku munota wa 82, Manchester United yabonye igitego cy’ishyura gitsinzwe na Amad Diallo ku mupira mwiza yanyujije mu biganza bya Aaron Ramsdale wari mu izamu rya Southampton. Ntibyahereye aho, kuko ku munota wa 90, Amad Diallo yongeye gutsinda igitego cya kabiri ku mupira watanzwe na Christian Eriksen. Iyi kipe y’i Manchester yasoje umukino neza, ubwo Amad Diallo yatsindaga igitego cya gatatu ku munota wa 90+4, ahamya intsinzi ya Manchester United ku bitego 3-1.

Gutsinda uyu mukino byatumye Manchester United igira amanota 24, ikomeza kuba ku mwanya wa 14 muri shampiyona. Southampton, nayo ikomeje kugorwa no kubona amanota mu mikino y’iyi shampiyona ni iyanyuma ku rutonde rwa English Premier League.

Mu wundi mukino wabaye kuri uyu munsi, Brighton & Hove Albion yatsinze Ipswich Town ibitego 2-0, ikomeza kwerekana ko iri mu makipe akomeye muri shampiyona y’uyu mwaka.

Amad Diallo yabaye intwari ya Man United ayifasha gutsinda Southampton

Cyera kabaye Man United yongeye kubona Intsinzi

Ibyishyimo byatangiye kugaruka mu mujyi wa manchester