Urwego rwe ruri hasi! Neymar ntabwo ari mu bakinnyi ikipe akinira izakoresha muri shampiyona

Mu mpeshyi ya 2023 ni bwo uyu mukinnyi yavuye mu ikipe ya Paris Saint-Germain yari amazemo imyaka 6, yerekeza mu ikipe ya Al Hilal yo muri Arabia Saudite. Neymar yari irindi zina rikomeye mu mupira w'amaguru rigiye muri iki gihugu nyuma y'abarimo Cristiano Ronaldo, Benzema, Mahrez, Mané, Seko Fofana.

Kimwe n'abandi nawe yasinye amasezerano amwemerera kubona ibifurumba by'amafaranga aho ahembwa amafaranga arenga miliyari 101 z'Amanyarwanda dore ko aza no muri 3 bahembwa amafaranga menshi ku Isi nyuma ya Cristiano Ronaldo wa mbere na Lionel Messi wa Kabiri.

Nubwo Neymar ahembwa na Al Hilal amafaranga menshi ariko asa nkaho yayihombeye bijyanye n'uko kuva yayigeramo ahorana ibibazo by'imvune. Akiyigeramo nyuma y'amezi abiri gusa yahise agira ikibazo cy'imvune cyatumye amara umwaka wose adakandagira mu kibuga. 

Nyuma yo kumara uyu mwaka ,mu mwaka ushize wa 2024 yongeye kugaruka mu kibuga ariko nyuma y'imikino 2 gusa ahita bivugwa ko azamara ibyumweru bine gusa hanze y'ikibuga ariko kugeza n'ubu ntabwo arasubira mu kibuga. 

Ibi byabaye bisanga uyu mukinnyi atarigeze yandikishwa n'ikipe ye ya Al Hilal mu bakinnyi izakoresha mu mikino ibanza ya shampiyona dore ko aho yongeye kuvunikira hatari imikino ya shampiyona ahubwo hari imikino y'andi marushanwa.

Ku munsi wejo kuwa Kane umutoza w'iyi kipe,Jorge Jesus yatangaje ko n'ubundi batigeze bandikisha Neymar mu bakinnyi bazakoresha mu mikino yo kwishyura ya shampiyona dore ko urwego rwayo rwamusize.

Yagize ati: "Shampiyona ya Arabiya Saudite ni imwe muri shampiyona nziza ku isi. Abakinnyi bose ba Al-Hilal bashobora gukinira amakipe yose yo ku mugabane w'i Burayi.

Neymar ntabwo ashoboye gukomeza gukina ku rwego turiho. Ibintu byaramugoye, birababaje. Aracyafite amasezerano na Al-Hilal kandi birashoboka ko ari we ugomba guhitamo ejo hazaza.

Bizaterwa n'ubuyobozi. Ntacyo nzi ku bijyanye n'ejo hazaza ha Neymar. Dufite umwanya uboneka ku rutonde rw'abakinnyi bemerewe gukina shampiyona, wagenewe umukinnyi wavutse 2003 cyangwa nyuma yaho".

Kuri ubu Neymar yemerewe gukinira Al Hilal indi mikino itari iya shampiyona irimo iya Champions League yo ku mugabane wa Asia.

Bivugwa ko uyu mukinnyi ashobora kuvugana n'iyi kipe akaba yasesa amasezerano akerekeza muri shampiyona y'icyiciro cya mbere muri Leta zunze ubumwe mu ikipe ya Inter Miami ikinamo abakinnyi bakinanye nawe muri FC Barcelona nka Messi na Luis Suarez.

Mu gihe bitaba ibi kandi ashobora kwerekeza no mu ikipe ya Chicago Fire nayo yo muri iyi shampiyona dore ko iri mu biganiro nawe nk'uko bitangazwa na BBC.

Neymar ntabwo ari mu bakinnyi Al Hilal izakoresha mu mikino yo kwishyura ya shampiyona nyuma yuko urwego rwe ruri hasi