Barcelona ishaka kumwakura Marcus Rashford ikamuvana muri Man United

Nk’uko byatangajwe n’ikinyamakuru Football Transfers, FC Barcelona yamaze kwegera Manchester United igamije kumvikana ku masezerano yo gutizwa Rashford. Aya masezerano ateganya ko Barcelona yabanza kumutizwa igihe gito, hanyuma ikazamusinyisha burundu mu mpeshyi ku kayabo ka Miliyoni 42 z’Amayero.

Marcus Rashford w’imyaka 27, amaze igihe kitari gito adahabwa amahirwe yo gukina mu mikino ya Manchester United. Muri iyi minsi ishize, ntabwo yagaragaye mu ikipe kandi yabaga yiteguye gukina aho byavugwaga  ko yifuza guhindura ikipe. Iki cyemezo kandi kirashimangirwa n’uko Manchester United nayo ishobora kuba yiteguye kumurekura kugira ngo ibone ubushobozi bwo gukomeza kubaka ikipe ikomeye.

Ikipe ya FC Barcelona iri gushakisha uburyo bwo kongeramo imbaraga mu busatirizi bwayo, cyane ko yashatse gukemura ibibazo by’imvune no gusimbura bamwe mu bakinnyi batagaragaza umusaruro uhagije.

Rashford, uzwiho umuvuduko, tekinike yo ku rwego rwo hejuru, ndetse n’ubushobozi bwo gutsinda ibitego, ni umwe mu bakinnyi Barcelona ibona bashobora gufasha iyi kipe kugera ku ntego zayo.

Nubwo ibiganiro bitaratangazwa ku mugaragaro, kuba Barcelona imaze kugaragaza ubushake bwo kumusinyisha, biratanga icyizere ko iyi kipe ishobora kugirana amasezerano na Manchester United mu minsi iri imbere.

Rashford nawe ashobora kuba abona aya mahirwe nk’uburyo bwo gukina mu buryo buhoraho no kumugarura ku rwego rwe rwo hejuru.

Marcus Rashford ashobora kujya muri Barcelona mu kwa mbere

Rashford wifuzwa na Barcelona, nta mwanya akibona muri Man United