Amavubi yatsindiwe muri Sudani y'Epfo mu gushaka itike ya CHAN 2024

Ni mu mukino wakinwe kuri iki Cyumweru Saa Cyenda kuri Juba International Stadium. 

Umukino watangiye ikipe y'igihugu y'u Rwanda, Amavubi yari ifite abafana benshi bagiye kuyishyigikira biganjemo Ingabo z'u Rwanda ziri mu Butumwa bw'Amahoro muri Sudani y'Epfo isatira binyuze ku barimo Mugisha Gilbert na Tuyisenge Arsene wabonaga bakinana neza.

Ku munota wa 13 ikipe y'igihugu ya Sudani y'Epfo yafunguye amazamu aho Nsabimana Aimable yatsinze igitego ku mupira yari ashyize ku mutwe gusa bikarangira Muhawenayo Gad ananiwe kuwufata.

Ikipe y'igihugu ya Sudani y'Epfo itakinaga byinshi yongeye kubona igitego cya kabiri ku munota wa 20 gitsinzwe na Malish Mandela ku munota wa 20 ku ishoti riremereye yari arekuriye inyuma y'urubuga rw'amahina.

Ngabonziza Pacifique wari wabanje mu kibuga yaje kugira ikibazo cy'imvune asimburwa na Kanamugire Roger.

Nyuma y'uko Amavubi atsinzwe yongeye kugerageza kwiharira umukino ahererekanya neza umupira ariko kugerageza uburyo imbere y'izamu ntibiyakundire neza aho ba myugariro ba Sudani y'Epfo babaga babaye ibamba.

Ku munota wa 40 Amavubi yarase uburyo bwashoboraga kuvamo igitego ku mupira mwiza Tuyisenge Arsene yari ahaye Muhire Kevin ari imbere y'izamu gusa ananirwa ku wushyira mu izamu.

Mbere y'uko igice cya mbere kirangira Amavubi yasatiriye cyane abarimo Ruboneka Jean Bosco bagerageza uburyo ariko ba myugariro ba Sudani y'Epfo bagakomeza kubyitwaramo neza.

Igice cya kabiri cyatangiye Jimmy Mulisa akora impinduka mu kibuga havamo Dushimimana Olivier 'Muzungu' hajyamo Mugisha Didier.

Ku munota wa 48 gusa Amavubi yabonye igitego cya mbere ku mupira waruzamukanywe na Mugisha Gilbert awushyira kwa Tuyisenge Arsene nawe awuha Muhire Kevin awushyira mu nshundura.

Bidatinze ku munota wa 57 uwitwa Ezbon Malish yatsinze igitego cya 3 cya Sudani y'Epfo ku mupira wari uzamuwe neza ashyiraho umutwe uragenda unyeganyeza inshundura.

Ku munota wa 67 Amavubi yatsinze igitego cya kabiri gitsinzwe na Mugisha Didier ku mupira yarahawe na Tuyisenge Arsene.

Nyuma y'uko ikipe y'igihugu y'u Rwanda, Amavubi yabonye igitego cya kabiri yakije umuriro imbere y'izamu rya Sudani y'Epfo bishoboka ko yabona igitego cya gatatu nk'aho Mugisha Didier yarekuye ishoti riremereye ryagana mu izamu ariko Tuyisenge Arsene akarikorakoraho bigatuma umupira urenga.

Umukino warangiye ikipe y'igihugu ya Sudani y'Epfo itsinze Amavubi ibitego 3-2.

Umukino wo kwishyura w'ijonjora rya nyuma ryo gushaka itike ya CHAN 2024 uzahuza Amavubi na Sudani y'Epfo,uzakinwa kuwa Gatandatu w'icyumweru gitaha tariki ya 28 muri Stade Amahoro.

Abakinnyi 11 b'Amavubi babanje mu kibuga;

1.Muhawenayo Gad 

2.Serumogo Ali

3. Niyomugabo Claude 

4. Niyigena Clement 

5. Nsabimana Aimable 

6. Ngabonziza Pacifique 

7. Dushimimana Olivier ‘Muzungu’

8. Ruboneka Bosco 

9. Tuyisenge Arsène 

10. Muhire Kevin 

11. Mugisha Gilbert

Amavubi yatsinzwe na Sudani y'Epfo ibitego 3-2