Ahabanza Imikino

Premier League: Liverpool yatangiye Noheli kuri Tottenham Hotspur mu mukino w'imvura y'ibitego

Yanditswe na: Aloys Niyonyungu
Taliki:22/12/2024 20:56 0

Ikipe ya Liverpool yahaye Noheoi abakunzi bayo itsinda Tottenham Hotspur mu mukino wo ku munsi wa 17 wa shampiyona y'icyiciro cya mbere mu Bwongereza wabonetsemo ibitego byinshi.

Ni mu mukino wakinwe kuri iki Cyumweru Saa kumi nebyiri n'iminota 30 kuri Tottenham Hotspur Stadium.

Umukino watangiye ikipe ya Liverpool iri hejuru ndetse ku munota wa 2 gusa yashoboraga kuba yafunguye amazamu ku mupira Fraser Forster yari yohereye Mohamed Salah ari imbere y'izamu gusa arekuye ishoti rinyura hepfo y'izamu gato cyane.

Ikipe ya Liverpool yakomeje kurusha Tottenham Hotspur mu buryo bugaragara gusa nayo ikanyuzamo ishaka gusatira binyuze ku ruhande rw'ibumoso rwakinwagaho na Heung Min Son ariko abarimo Trent Alexander Arnold akaba maso.

Ku munota wa 23 Luis Diaz wa Liverpool yafunguye amazamu akoresheje umutwe ku mupira mwiza waruzamuwe na Trent Alexander Arnold.

Nyuma y'uko Liverpool ya Arne Slot ifunguye amazamu yakomeje gusatira maze ku munota wa 36 Alexis Mac Allister atsinda igitego cya 2 akoresheje umutwe.

Ku munota wa 41 Tottenham Hotspur nayo yabonye igitego ku mupira wari utakajwe na Mac Allister ufatwa na James Maddison arekura ishoti riruhukira mu nshundura.

Mbere y'uko igice cya mbere kirangira Liverpool yabonye igitego cya 3 gitsinzwe na Dominic Szoboszlai ku mupira yarahawe na Mohamed Salah.

Mu gice cya kabiri n'ubundi Liverpool yaje isatira maze ku munota wa 54 gusa Mohamed Salah atsinda igitego cya 4.

Ku munota wa 61 Umunya-Misiri, Mohamed Salah yatsinze icya 5 ku mupira yarahawe na Dominic Szoboszlai.

Nyuma y'uko Liverpool itsinze igitego cya 5 yabaye nk'iyiraye bituma Tottenham Hotspur ibona uburyo bwo gukina ndetse iranasatira cyane.

Ku munota wa 73 Dejan Kulusevski yatsinze igitego cya 2 ahawe umupira na Dominic Solanke. Ku wa 83 Tottenham Hotspur yabonye igitego cya 3 gitsinzwe na Dominic Solanke ahawe umupira na Brendan Johnson.

Ku munota wa 85 Luis Diaz yahise atsinda igitego cya 6 cya Liverpool ku mupira yarahawe na Mohamed Salah. Umukino warangiye Tottenham Hotspur itsinzwe ibitego 6-3.

Liverpool ikomeje kuba ku mwanya wa mbere ku rutonde rwa shampiyona n'amanota 39 mu gihe Tottenham Hotspur yo yahise ijya ku mwanya wa 11 n'amanota 23.