Byinshi ku 'Isanduku ya Murumuna wa Yesu' yavumbuwe muri Israel

Agasanduku k’Amagufa Ka Yakobo, Mwene Se wa Yesu, Kaba Gashobora Kuba Ikimenyetso Gihambaye Cy’Igihe cya Kristo

Bitewe n’uko izina ryanditseho rihura n’iry’umuryango wa Yesu w’i Nazareti, benshi bakeka ko ako gasanduku kigeze kubikwamo amagufa ya Yakobo Umukiranutsi, umuyobozi wa mbere w’abakristo i Yerusalemu nyuma y’urupfu rwa Yesu.

Uyu munsi, ako gasanduku kagaragara mu imurikabikorwa ribera i Pullman Yards muri Atlanta, rikaba ririmo ibintu bisaga 350 by’amateka y’igihe cya Yesu.

Dailmaily dukesha iyi nkuru ivuga ko ako gasanduku kavumbuwe mu 1976, ariko kaje gushyirwa ahagaragara ku mugaragaro mu 2002. Abahanga mu by’amateka bakabaye baracyaga intambara y’imvugo kuri nyir’ako gasanduku, Oded Golan, wamaze imyaka 10 mu manza ashinjwa ko yongereyeho amagambo agira ati: “mwene se wa Yesu.” Nyuma y’ubushakashatsi bwa gihanga n’ibizamini bya kemikali, Golan yatsinze urubanza, ariko umucamanza yasize avuga ko nta gihamya ifatika gihari cyerekana ko inyandiko iri ku gasanduku yanditswe koko mu gihe cya Kristo.

 Golan yagize ati: "Twarebye neza inyandiko iri ku gasanduku, duhamya ko ari iy’ukuri kandi ko yanditswe mu gihe cy’imyaka ibarirwa mu bihumbi ishize."

Iyo byemerwa ko ari ukuri, aka gasanduku kaba kaba ikimenyetso cya mbere cya kera kigaragaza Yesu w’i Nazareti. Mu kinyejana cya mbere, Abayahudi bashyinguraga abapfuye mu buvumo, hanyuma amagufa yabo akagenda ashyirwa mu dusanduku twakozwe mu mazi n’ibikoresho bikomeye.

Gusa, bamwe mu bigisha imyemerere bafite impungenge z’uko bishobora kuba ari impimbano, cyane cyane abemera ko Mariya yakomeje kuba isugi iteka, bityo bagahakana ko Yesu yari afite abavandimwe ba hafi.

 Umuryango wa Yesu n’Ibyanditswe

Bibiliya ivuga ku bavandimwe ba Yesu inshuro nyinshi: Yakobo, Yuda, Simoni, na Yozesi. Yakobo ahamagarwa bwa mbere muri bo bose, bikerekana ko yari mukuru muri barumuna be. Ariko kandi, Bibiliya inavuga ko abavandimwe ba Yesu batemeraga ubutumwa bwe mu ntangiriro (Mariko 3:21).

 Amateka y’itorero rya mbere avuga ko Yakobo yapfuye urupfu rw’ubutwari ubwo yicwaga atewe amabuye ku rusengero mu myaka ya 60AD.

 Ubushakashatsi ku Mva y’Umuryango wa Yesu

Mu 2015, abashakashatsi bagerageje kwemeza niba ako gasanduku kavumbuwe kari mu mva ya Talpiot, ahantu havumbuwe mu 1980 mu majyepfo ya Yerusalemu. Iyo mva yari ifite andi masanduku atandatu, arimo amazina ahuye n’ay’umuryango wa Yesu. Ubusesenguzi bwa kemikali bwagaragaje ibimenyetso bihuje hagati y’ako gasanduku n’ibyo byavumbuwe mu mva.

 Ibyanditswe byafashwe nk'ibyahawe urubanza

Mu 2017, haje kugaragara urwandiko rw’imyaka 1,600 ruvuga kuri Yakobo mu buryo budasanzwe, rwitwa ‘Ibyahishuwe bya mbere bya Yakobo.’ Uru rwandiko rushimangira ko Yakobo ari mwene se wa Yesu, ariko rukabigaragaza mu buryo bw’umwuka kurusha umubiri. Uru rwandiko ni kimwe mu nyandiko za Nag Hammadi, zitwaga ko zihindura inyigisho z’ubukristu bwa kera, bityo zikagirwa "izibujijwe."

Nubwo amagufa yari mu gasanduku yaburiwe irengero, ibiganiro ku kamaro k’aka gasanduku n’ubutumwa kagerageza gutanga biracyakomeje kugeza n’uyu munsi.

Umwanditsi: KUBWIMANA Solange