Abantu 5 biciwe mu gitero cy’Imodoka ku isoko rya Noweli mu Budage

Abantu batanu, harimo n’umwana wimyaka 9, baraye biciwe mu gitero cy’imodoka cyabereye ku isoko rya Noheli mu mujyi wa Magdeburg, mu burasirazuba bw’u Budage. Abategetsi batangaje ko abantu 68 gusa imibare mishya irimo kugaragaza 200 ko bakomeretse, harimo 90 bafite ibikomere bikomeye. 

Reiner Haseloff, Minisitiri w’Intebe wa Saxony-Anhalt, yavuze ko ukekwa, umugabo w’imyaka 50 ukomoka muri Arabia Sawudite, yafatiwe aho byabereye. Uyu mugabo yari amaze imyaka 18 mu Budage, aho yahageze mu 2006 nk’umuganga. 

Nubwo iperereza ry’ibanze ryerekana ko ukekwa yakoze iki gitero wenyine, abategetsi baracyakomeje gushakisha ibimenyetso bishobora kwerekana impamvu yatumye abikora. Nta sano ifatika ifitanye n’imitwe y’iterabwoba cyangwa idini rya Isilamu. Ahubwo, yagiye agaragara anenga cyane iryo dini ku mbuga nkoranyambaga. 

Ku isoko ya Noweli, imodoka yagonze abantu benshi, abandi basigara baryamye hasi batabashije guhunga. Abapolisi, abaganga, n’abashinzwe kuzimya umuriro bagera ku 150 bahise batabara.  

Umukuru w’u Budage, Olaf Scholz, yihanganishije imiryango yabuze ababo anashimira abatanze ubutabazi bwihuse. Biteganyijwe ko uyu munsi Scholz azasura Magdeburg, aho hateguwe n’umuhango wo kwibuka abaguye mu gitero. 

Iki gitero kibaye nyuma y’imyaka 8 undi mugabo, Anis Amri, watwaye  ikamyo mu bantu ku isoko rya Noweli i Berlin, yishe 12 abandi 49 bagakomereka. Abategetsi barasaba gukaza ingamba z’umutekano ahantu hateranira imbaga nyamwinshi nk'uko bitangazwa na Sky News.

Umwanditsi: TUYIHIMITIMA Irene