Abepiskopi bo muri ACEAC bahuriye i Burundi mu nama yiga ku kibazo cy'umutekano mucye mu Karere

Kuwa 21 Ugushyingo 2024, mu Ngoro y'Umukuru w'Igihugu cy'U Burundi, Visi Perezida w'u Burundi, Prosper Bazombanza, yakiriye Abepiskopi bahagarariye ACEAC bari kumwe n'Abahagarariye Komisiyo y'Ubutabera n'Amahoro.

Iki gikorwa cyabaye nyuma y'Inama yabereye i Bujumbura mu Burundi guhera tariki 19 Ugushyingo 2024, yari igamije kurebera hamwe icyakorwa kugira ngo ikibazo cy'umutekano mucye n'umubano mubi hagati y'ibihugu bigize akarere ka Afurika yo hagati bikemuka.

Mu gusoza iyi nama, Abayitabiriye bagiranye Ibiganiro n'Ubuyobozi bukuru bw'u Burundi, aho bakiriwe na Visi Perezida Prosper Bazombanza, mu Izina ry'umukuru w'igihugu, Evariste Ndayishimiye.

Kuganira n'abayobozi bakuru b'ibihugu bigize Akarere ka Afurika yo Hagati ni umwe mu myanzuro yavuye mu Ihuriro ry'Amahoro ryabereye i Goma muri RDC, muri Mutarama 2024, aho Kiliziya muri aka karere yiyemeje kuganira n'Abayobozi bakuru b'ibihugu mu rwego rwo kubasaba gushyira imbere inzira y'amahoro kugira ngo abaturage bongere gushyikirana nk'abavandimwe.

N'ubwo ibyavuye muri ibi biganiro bitashyizwe ahagaragara, igihugu cy'u Burundi kirarebwa by'umwihariko n'ifungwa ry'imipaka yo ku Butaka igihuza n'u Rwanda. Abepiskopi bagize ACOREBU bakomeje gusaba iki gihugu kudohorera abaturage bagizweho ingaruka n'iki cyemezo bagafungura imipaka vuba na Bwangu. Nyamara iki gihugu cyakomeje kwinangira.

Bibaye inshuro ya Kabiri Abepiskopi bagize ACEAC bakirwa n'Abayobozi bakuru b'u Burundi. Bigaragaza ko aba bayobozi bakira neza umurongo bihaye wo guharanira amahoro mu karere bikaba bitanga ikizere ko n'ibyo babasaba bazagira ubushake bwo kubishyira mu bikorwa bafatanyije na bagenzi babo bo mu bihugu bamaze iminsi batavuga rumwe birimo n'u Rwanda.

Abepiskopi bahagarariye ACEAC bakiriwe kwa NTARE RUSHATSI

Src: Kinyamateka