Rutahizamu w'ikipe y'igihugu ya Portugal na Al Nassr yo muri Arabia Saudite, Cristiano Ronaldo yateguje gutigisa imbuga nkoranyambaga akoresheje shene ya YouTube, benshi batekereza Lionel Messi.
Amezi agiye kuba atatu Cristiano Ronaldo ashinze shene ya YouTube yise 'UR Cristiano'. Nyuma y'uko iyi shene ikoze amateka yo kuba yaragize abayikurikira Miliyoni 20 mu gihe kingana n'amasaha 24 kugeza ubu imaze kugira abayikurikira bagera kuri Miliyoni 67.
Amashusho aheruka kuri iyi shene, ni ayashyizweho ku munsi w'ejo yerekana Rio Ferdinand yagiye mu rugo kwa Cristiano Ronaldo ngo bagirane ikiganiro. Muri aya mashusho Rio Ferdinand yibajije undi uzamukurikira mu kugirana ikiganiro n'uyu mukinnyi ubitse Ballon d'Or 5.
Cristiano Ronaldo yahise avuga ko ari ibanga naho uyu munyabigwi wa Manchester United amubaza niba ari umuntu uzwi, nawe amusubiza ko ari umuntu uzwi kumurusha.
Aba bombi bakomeje kuganira maze birangira Cristiano Ronaldo avuze ko umuntu azagirana nawe akiganiro kuri shene ya YouTube nyuma ya Rio Ferdinand azanyeganyeza imbuga nkoranyambaga ku buryo bukomeye.
Aha niho benshi bahereye berekana ko uwo muntu ashobora kuba ari mukeba we Lionel Messi naho abandi berekana ko wenda ashobora kuba ari Mr Beast nawe uzwi cyane ku rubuga rwa YouTube aho afite abamukurikira bagera kuri Mliyoni 330.
Kugeza ubu ikiganiro Cristiano Ronaldo yagiranye na Rio Ferdinand kimaze kurebwa n'abarenga Miliyoni 16 mu gihe ikiganiro kimaze kurebwa cyane kuva yashinga iyi shene ya YouTube ari icyo ari kumwe n'abana be mu rugo.
Cristiano Ronaldo yabwiye Rio Ferdinand ko undi muntu azakira nyuma ye azatigisa imbuga nkoranyambaga
Eng
RSS 
TANGA IGITECYEREZO