Imbamutima za Uwase Fatina watsinze igitego cyafunguye shampiyona ya U17 -VIDEO

Kuri iki Cyumweru itariki 17 Ugushyingo 2024 kuri Kigali Pele Stadium hatangirijwe shampiyona y’abatarengeje imyaka 17 mu byiciro by’abahungu n’abakobwa. Ni shampiyona igiye kujya ikinwa hakurikije amategeko agenga shampiyona mpuzamahanga, ikaba kandi igamije kuzamura impano z’abakinnyi batandukanye mu by’iciro by’abagore no mu bagabo.

Umukino wafunguye iyi mikino ni uwahuje Police WFC U17 na APR W FC U17. Ubwo uyu mukino wakinwaga, Uwase Fatina wa APR W FC U17 niwe watsinze igitego cya mbere ubwo yafunguraga amazamu ku ruhande rwa APR W FC U17, kiba igitego cya mbere mu marushanwa y’abatarengeje imyaka 17.

Mu magambo ye, Fatina yashimiye bagenzi be, avuga ko kuba yatsinze icyo gitego nabo kuko iyo batahaba atari kubigeraho.

Uwase Fatina watsinze igitego afungura shampiyona y’abatarengeje imyaka 17 mu bagore yagize ati “ Kuba natsinze igitego gifungura shampiyona byanshimishije nubwo bitari byoroshye. Sinjye wabikoze njyenyine ahubwo nafatanyije n’ikipe yanjye.

Uwase Fatina wafunguye amazamu muri shampiyona y’abatarengeje imyaka 17 yavuze ko nubwo umukino warangiye batsinze Police WFC U17 ibitego bibiri kuri kimwe, na Police ari ikipe nziza cyane.

Ati” Police WFC U17 nayo ni ikipe nziza ariko twayirushije kubatanga umupira ndetse hagati yacu twahuje umukino neza. Umutoza yari yadusabye ko ntakuva ku izima badutsinda batadutsinda gahunda yari uguhatana dukurikije ibyo umutoza yadutoje kandi neza.

Uwase Fatina yashimiye FERWAFA yashizeho shampiyona y’abatarengeje imyaka 17, cyane ko abona ije guha amahirwe abakinnyi bakiri bato ikababera urubuga rwo kwigaragaza.  

Yakanguriye abakobwa bagenzi be gukunda umupira w’amaguru, ashimangira ko utaremewe abahungu gusa.

“ Turashimira FERWAFA yadutekerejeho nk’abana bato ikadushiriraho shampiyona ngo natwe twigaragaze, turayishimira cyane kuko biba byadushimishije kubona turi kuzamura urwego rwacu.

Bagenzi bacu nabo nabashishikariza gukina umupira kuko umupira ntabwo ari uw’abahungu gusa, n’abakobwa natwe twayikina. Ubu mfite intego yo kuzakinira ikipe y’igihugu cyane ko mfatira urugero kuri Mukeshimana Dorothee ukinira Rayon Sports akaba yambara nimero umunani nkanjye.

Mu yindi mikino yakinwe mu cyiciro cy’abagore muri shampiyona y’abatarengeje imyaka 17, Bugesera yatsinze Muhazi 4-0, Mutunda Fatima 10-1, Forever itsinda Inyemera 2-0, Indahangarwa itsinda AS Kigali 3-0, naho Kamonyi igwa miswi na Rayon Sports igitego kimwe kuri kimwe.

">