Nzarora Marcel wamamaye mu izamu ry'Amavubi yarongoye

Nzarora Marcel wakiniye ikipe y’igihugu y’Abatarengeje imyaka 17 mu gikombe cy’Isi cyabereye muri Mexique mu 2011, ubu ari mu munyenga w’urukundo n’umukunzi we nyuma y’imyaka ibiri bakundana.

Ubukwe bwabo bwabaye mu mpera z’icyumweru gishize, ndetse bwabereye mu gihugu cya Uganda, aho ababyeyi ba Brenda batuye. 

Ni ubukwe bwitabiriwe n’inshuti n’abakunzi b’uyu mukinnyi, harimo na bagenzi be bakinanye nka Munyangondo Pascal (Kacale), Sebanani Emmanuel Crespo na Mucyo Philbert wamwambariye.

Marcel Nzarora yavuye mu Rwanda ajya mu Burayi muri Kanama 2019, aho yagiye gukina muri Écosse mu ikipe ya RR FC, ariko kubera ibibazo by’imyitwarire yahise agaruka mu Rwanda. 

Nyuma yaho, yasubiye i Burayi gukomeza amasomo ndetse no gukina umupira w’amaguru ariko ntiyagumamo igihe kinini. Ubu abarizwa mu gihugu cya Wales aho akora muri sosiyete ya Amazon, akaba yarahagaritse gukina umupira w’amaguru.

Namugenyi Brenda, nyuma yo gukurira mu gihugu cya Uganda, yaje mu Rwanda aho yari asoje amashuri muri Kaminuza ya Mudende. Yabonye akazi muri Kigali, aho akora nk’umucungamali muri sosiyete ya NPD, kandi akora akandi kazi ko gutanga imyitozo muri za Gym zo mu mujyi wa Kigali by’umwihariko muri La Palisse.

Nyuma y’ubukwe, Marcel yatangaje ko umugore we Namugenyi Brenda, azakomeza akazi ke nk’umucungamali no muri Gym, naho we azasubira mu mirimo ye y’ubuzima busanzwe ku mugabane w'iburayi. 

Marcel yamenyekanye mu makipe atandukanye yo mu Rwanda, arimo Police FC, Rayon Sports, Musanze FC, ndetse na Mukura Victory Sports.

Ubukwe bw’uyu mukinnyi bwagaragaje umunezero ndetse n’urukundo rw’ibihe byinshi, aho abakunzi b’umupira w’amaguru bari bakurikiye inkuru y’urukundo rwabo, bakaba bari banishimiye kubona Marcel n’umukunzi we binjira mu gisekuru gishya cy’umuryango. 

Nzarora Marcel wamamaye mu ikipe y'igihugu y'u Rwanda yakoze ubukwe na Brenda 

Inshuti za Nzarora Marcel zamushigikiye mu bukwe bwe na Brenda