Undi mukinnyi ukomeye muri Arsenal yahuye n’imvune, yaba ari amahirwe ya Ethan Nwaneri?

Ikipe ya Arsenal ihangayikishijwe n’imvune y’umukinnyi Leandro Trossard, wavunitse mu mukino w’ikipe y’igihugu y’u Bubiligi wabaye ku mugoroba w’ejo ku Cyumweru. 

Fabrizio Romano, umunyamakuru wizewe mu by’umupira w’amaguru, yatangaje kuri X (Twitter) ko uyu mukinnyi yasimbujwe kubera ikibazo cy’imvune, n'ubwo itaramenyekana neza niba byari ikibazo gikomeye cyangwa zari ingamba zo kumurinda kuvunika cyane.

Trossard ni umwe mu bakinnyi bakomeye cyane Mikel Arteta ari kwifashisha muri uyu mwaka w’imikino. Uretse kuba afite ubushobozi bwo gukina mu myanya itandukanye, yagize uruhare rukomeye mu kwitwara neza kw’ikipe. 

Gusa uyu mwaka ntabwo ibintu byose byamuhiriye kuko yakunze gukinishwa mu mwanya wa Martin Odegaard igihe uyu Kapiteni wa Arsenal yari yaravunitse. Ibyo byatumye atagaragaza neza impano ye kuko yakinaga mu mwanya utari uwe usanzwe.

Ubu hari kwibazwa niba iyi mvune ye izatuma Arsenal ihindura byinshi mu mikinire. Benshi mu bafana basanga ari igihe cyiza cyo guha umwana w’imyaka 17, Ethan Nwaneri, amahirwe yo kwigaragaza. 

Nwaneri, usanzwe afite impano idasanzwe, amaze kugera ku rwego rwiza ariko umutoza Arteta yagiye agaragaza kwitonda mu kumukinisha mu mikino ikomeye.

N'ubwo Odegaard yasubiye mu kibuga, ikibazo cya Trossard cyashobora gutuma Arsenal ifata icyemezo cyo guhindura imikinire, aho byashoboka ko umwana Nwaneri ahabwa amahirwe yo gukina mu mwanya asanzwe akina neza. 

Ku rundi ruhande, iyi mvune ishobora guha Arteta isomo ryo kutongera guhatiriza gukinisha abakinnyi mu myanya itari iyabo.