Portugal iracakirana na Croatia idafite ibikurankota byayo birimo na CR7

Ikipe y’igihugu ya Portugal irakina na Croatia kuri uyu wa Mbere itariki 18 Ugushyingo mu mujyi wa Split mu marushanwa ya UEFA Nations League. Nubwo yageze muri 1/4 cy’irangiza itaratsindwa, Portugal irashaka gutsinda uyu mukino ikongerera amanota 3 ku yandi 13 ifite, bikarushaho kugaragaza ko ari imwe mu makipe akomeye muri aya marushanwa.

Mu myitozo yabereye mu mujyi wa Split, umutoza Roberto Martinez yafashe icyemezo cyo kuruhutsa bamwe mu bakinnyi bakomeye barimo Cristiano Ronaldo, Pedro Neto, Bernardo Silva, na Bruno Fernandes. 

Ibi byatumye benshi bibaza niba Portugal ishobora kwikura mu nzara za Croatia idafite izi nkingi zayo. Gusa Joao Cancelo, umwe mu bakinnyi beza b'inyuma, yemeje ko ikipe ifite ubushobozi bwo gutsinda kuko irimo abakinnyi b'abahanga kandi bafite inararibonye.

Ku rundi ruhande, Croatia nayo iri mu rugamba rukomeye. Umutoza Zlatko Dalic yavuze ko n’ubwo bakeneye kunganya gusa kugira ngo babone itike yo kugera muri 1/4, atiteguye gukina agamije gushaka inota rimwe. Ati: "Tugomba gukina dushaka gutsinda. Icyo ni cyo kizaduha icyizere cyo gukomeza mu marushanwa".

Croatia iheruka gutsindwa na Scotland 1-0, byatumye igira amanota 7 mu itsinda, ikaba iri inyuma ya Portugal amanota 6 yose. Iyi kipe ikeneye kwitwara neza cyane imbere y’abafana bayo kugira ngo itisanga yasezerewe.

Uyu mukino utegerejwe n’abantu benshi uraba ari amahirwe akomeye yo kureba uko Portugal ikomeza kwitwara mu gihe Ronaldo na bagenzi be bakomeye badakinnye uyu mukino ndetse no kureba niba Croatia ishobora kwikura mu matsinda. 

Criatia iracakirana na Portugal hatarimo Cristiano Ronaldo