Col (Rtd) Richard Karasira ntabwo akiri Chairman wa APR FC

Amakuru avuga ko Colonel(Rtd) Richard Karasira yamenyeshejwe ko atakiri Chairman w'iyi kipe y'Ingabo z'igihugu kuri uyu wa Kane tariki ya 7 Ugushingo 2024.

Ibi bibaye nyuma y'uko APR FC yari imaze iminsi ititwara neza aho usibye kuba yarasezerewe na Pyramids FC mu ijonjora rya kabiri rya CAF Champions League ,no muri shampiyona bitameze neza kuko mu mikino itatu yatsinzemo umukino umwe ba Gasogi United.

Iyi kipe kandi ku munsi w'ejo yatewe mpaga nyuma y'uko yakinishije abakinnyi b'Abanyamahanga barindwi kandi hemewe batandatu ku mukino na Gorilla FC.

Colonel(Rtd) Richard Karasira akuwe ku inshingano zo kuba Chairman wa APR FC nyuma ya Erik Ntazinda wari Team Manager wahagaritswe ndetse n'uwari ushinzwe umutungo w'ikipe,Kalisa Georgine utarongerewe amasezerano.

Colonel(Rtd) Richard Karasira yari yarageze ku nshingano zo kuba Chairman wa APR FC mu mwaka ushize mu kwezi kwa 6 aho yari asimbuye Gen Mubarakh Muganga.

Ari kuri izi nshingano yatwaranye n'iyi kipe igikombe cya shampiyona cy'umwaka ushize w'imikino ndetse ni nabwo APR FC yavuye kuri gahunda yo gukinisha abakinnyi b'Abanyarwanda igasubira ku yo gukinisha Abanyamahanga.

Colonel(Rtd) Richard Karasira  utakiri ku inshingano zo kuba Chairman w'ikipe ya APR FC