Arsenal na Manchester City zakambakambye naho Liverpool isubirana umwanya wa mbere

Ni mu mikino yo ku munsi wa 10 wa shampiyona y'icyiciro cya mbere mu Bwongereza yakinwe kuri uyu wa Gatandatu taliki ya 2 Ugushingo 2024.

Umukino wabanjirije indi ni uwo ikipe ya Newcastle United yakiriyemo Arsenal kuri St James' Park. Ikipe ya Arsenal yagiye gukina uyu mukino nyuma y'uko myugariro wayo igenderaho, Willam Salina avuye mu bihano byo kuba yari yarahawe ikarita y'umutuku, gusa ntabwo byayibujije gutsindwa muri uyu mukino dore ko yatsinzwe igitego 1-0. 

Ni igitego cyabonetse hakiri kare ku munota wa 13 gitsinzwe na Alexander Isaak ku mupira yahawe na Anthony Gordon. Arsenal ikomeje gutakaza amanota yahise ijya ku mwanya wa 4 n'amanota 18 mu gihe Newcastle United yo yahise ijya ku mwanya wa 9 n'amanota 15.

Saa kumi n'imwe ikipe ya AFC Bournemouth yakiriye Manchester City kuri Vitality Stadium. Ikipe ya Manchester City yahabwaga amahirwe kuri uyu mukino byarangiye itunguwe itsindwa ibitego 2-1. 

Ibitego bya AFC Bournemouth byatsinzwe na Semenyo ku munota wa 9, Evanilson ku munota wa 64 naho icya Manchester City cyo cyatsinzwe na Gvadiol ku mupira yahawe na Ilkay Gundogan.

Manchester City yahise itakaza umwanya wa mbere ijya ku mwanya wa kabiri n'amanota 23 mu gihe AFC Bournemouth yo yagiye ku mwanya wa 8 n'amanota 15.

Undi mukino nawo wakinwaga Saa kumi n'imwe ni uwo ikipe ya Liverpool yakiriyemo Brighton kuri Anfield. Nk'uko byari byitezwe ikipe ya Liverpool niyo yegukanye amanota atatu itsinze ibitego 2-1. 

Ni ibitego byatsinzwe na Cody Gakpo ku munota wa 69 ku mupira yahawe na Virgil Van Dijk na Mohamed Salah ku munota wa 72 ahawe umupira na Curtis Jones, mu gihe kimwe cya Brighton cyo cyabonetse ku munota wa 14 gitsinzwe na Danny Welbeck.

Liverpool yahise isubira ku mwanya wa mbere n'amanota 25 nyuma yuko yari yawutakaje ku munsi wa 9 wa shampiyona ikimara kunganya na Arsenal.

Kuri iki Cyumweru shampiyona y'icyiciro cya mbere mu Bwongereza irakomeza, aho saa kumi z'umugoroba Tottenham Hotspur icakirana na Aston Villa naho saa kumi n'ebyiri n'iminota 30 Manchester United yakire Chelsea.