Imvune ya Bukayo Saka yatumye akurwa mu ikipe y’igihugu

Ubwo u Bwongereza bwatsindwaga n’ubugereki mu mikino ya UEFA Nations League, Bukayo Saka yavanywe mu kibuga mu gice cya kabiri asimbujwe nyuma yo kuvunika mu kuguru kw’iburyo.

Ikinyamakuru BBC Sports cyatangaje iyi nkuru, cyagaragaje ko atari u Bwongereza gusa buzahomba Bukayo Saka ku mukino wa Finiland, ahubwo n’ikipe ya Arsenal akinira ishobora kuzagira imikino ikina itamufite. 

Mu mukino 10 Saka amaze gukinira Arsenal muri uyu mwaka w’imikino, amaze kuyitsindira ibitego bitatu. Ni we uza ku mwanya wa mbere mu bamaze gutanga 'Assists' nyinshi zigera kuri 7 muri shampiyona y'uyu mwaka. 

Nyuma y’imikino y’amakipe y’ibihugu, Arsenal izakurikizaho ikipe ya Bournemouth ku itariki 19 Ukwakira, bikaba biteganyijwe ko uwo ari umwe mu mikino Arsenal ishobora gukina idafite Bukayo Saka.

Nubwo Bukayo Saka yakuwe mu mubare w’abakinnyi bitegura gucakirana na Finiland, u Bwongereza bwamaze kugarura abakinnyi nka Harry Kane na Jack Grealish batakinnye umukino w’Ubugereki kubera imvune ariko kuri uyu wa Gatandatu bakaba bagarutse mu myitozo.

U Bwongereza bufite amanota 6/9 mu mikino ya UEFA Nations League muri League B mu itsinda rya kabiri. Mu mikino itatu bumaze gukina batsinze ibiri butsindwa umwe.

Bukayo Saka yakuwe mu bakinnyi bazakina na Finiland kubera imvune 

Imvune ya Saka ishobora gukoma mu nkokora ikipe ya Arsenal asanzwe akinira

Bukayo Saka wari umaze iminsi afatiye runini Arsenal ashobora kutazakina na Bournemouth