Ikipe y'igihugu y'u Rwanda, Amavubi, yatomboye kuzakina Djibouti mu ijonjora ry'ibanze ryo gushaka itike y'imikino ya Shampiyona Nyafurika ihuza amakipe y’ibihugu y’abakinnyi bakina imbere muri za Shampiyona zabo (CHAN 2024) izabera muri Kenya, Tanzania na Uganda.
Ni tombola yabaye ku gicamunsi cyo kuri uyu wa Gatatu taliki ya 9 Ukwakira 2024 ibera ku biro bikuru by'impuzamashyirahamwe y'umupira w'amaguru ku mugabane w'Afurika, CAF, i Cairo mu Misiri.
Amavubi yisanze agomba kuzakina na Djibouti mu ijonjora ry'ibanze aho ikipe izakomeza izahura n'izakomeza hagati ya Sudani y'Epfo na Kenya mu ijonjora rya kabiri.
Muri iyi mikino yo gushaka itike ya CHAN 2024, amakipe y'ibihugu yatomboranye bigendanye n'agace aherereyemo aho buri gace kazatanga amakipe atatu azagahagararira usibye agace ka Afurika y'Iburasirazaba ko kazatanga amakipe ane.
Impamvu CECAFA izatanga amakipe ane ni ukubera ko amakipe y'ibihugu atatu azakira ariho aturuka kandi yo n'ubundi akaba afite itike. Ubwo bivuze ko ikipe y'igihugu y'u Rwanda, iya Ethiopia, u Burundi, Djibouti, Sudani niya Sudani y'Epfo bo bazahatanira umwanya umwe.
Biteganyijwe ko imikino yo mu ijonjora ry'ibanze izakinwa hagati ya taliki ya 25-27 Ukwakira na taliki ya 01-3 Ugushyingo naho iyo mu ijonjora rya kabiri ikaba hagati ya taliki ya 20-22 na 27-29 Ukuboza 2024.
Imikino ya CHAN 2024 nyirizina yo izakinwa ko hagati ya tariki ya 1-28 z'ukwezi kwa Kabiri mu mwaka utaha ikinirwe muri Kenya, Tanzania na Uganda.
Amavubi yatomboye kuzakina na Djibouti mu ijonjora ry'ibanze ryo gushaka itike y'imikino ya Shampiyona Nyafurika ihuza amakipe y’ibihugu y’abakinnyi bakina imbere muri za Shampiyona zabo (CHAN 2024) izabera muri Kenya, Tanzania na Uganda.
Eng
RSS 
TANGA IGITECYEREZO