Jurgen Klopp yagarutse mu mupira w'amaguru nyuma yo gutandukana na Liverpool

Tariki ya 19 z'ukwezi kwa Gicurasi muri uyu mwaka ni bwo Jurgen Klopp yatoje umukino we wa nyuma mu ikipe ya Liverpool ndetse anasezerwaho mu marira menshi nyuma y'uko yari yaratangaje ko atazakomezanya nayo.

Uyu mutoza yatandukanye na Liverpool ayimazemo imyaka 9 ndetse akaba yaranatwayaranye nayo ibikombe 9 birimo kimwe cya UEFA Champions League na kimwe cya Premier League.

Kuri ubu yabonye akazi gashya aho yagizwe Umuyobozi w'amakipe ya Red Bull ku Isi ariyo RB Leipzig yo mu Budage, Red Bull Salzburg yo muri Autriche, New York Red Bulls yo muri Amerika na Red Bull Bragantino yo muri Brésil.

Red Bull ni sosiyete ifite amakipe atandukanye mu mikino y'umupira w’amaguru, Formula 1, Ice Hockey n’indi.

Jurgen Klopp utazatangira akazi mu kwezi kwa Mbere k'umwaka utaha, azajya atanga amahugurwa ku batoza b’amakipe y'iyi sosiyete mu mupira w'amaguru, ajye inama kuri filozofi yayo, uburyo bw’imigurire y’abakinnyi, guteza imbere umupira muri rusange n'ibindi.

Uyu mutoza w'imyaka 57 wanabayeho umukinnyi, yatangiye gutoza mu 2001 ahereye mu ikipe ya FSV Mainz 05 y'iwabo, ayivamo muri 2005 ajya muri Borussia Dortmund nayo ayivamo mu mwaka wa 2015 ajya muri Liverpool.