Amagare: Abakinnyi 22 bahagarariye u Rwanda muri Shampiyona Nyafurika

Iri rushanwa ryitabiriwe n'ibihugu 20 byo ku Mugabane wa Afurika rirakinwa kuva kuri uyu wa Kane tariki ya 9 kuzageza ku Cyumweru tariki ya 13 Ukwakira 2024. 

Ikipe y'u Rwanda yahagurutse ku kibuga cy'indege i Kanombe ku mugoroba wo kuri uyu wa Kabiri tariki ya 8 Ukwakira 2024,  mu bagabo igizwe n’abakinnyi 8 ari bo Manizabayo Eric, Mugisha Moïse, Nsengiyumva Shemu, Uwiduhaye Mike, Nkundabera Eric, Munyaneza Didier, Byukusenge Patrick na Ngendahayo Jérémie.

Abagore ni Ingabire Diane, Nzayisenga Valentine, Mwamikazi Jazilla na Mukashema Josiane.

Mu bagabo batarengeje imyaka 23, u Rwanda ruhagarariwe na Masengesho Vainqueur, Tuyizere Étienne, Muhoza Eric na Uhiriwe Espoir mu gihe ingimbi ari Nshimiyimana Phocas, Nshutiraguma Kevin, Ntirenganya Moïse na Ufitimana Shadracke.

Ni mu gihe Abangavu  bahagaririye u Rwanda ari Iragena Charlotte na Umutoni Sandrine.

Kuri uyu wa Gatatu tariki ya 9 Ukwakira harakinwa gusiganwa n’igihe mu bahungu n’abakobwa, ingimbi, abatarengeje imyaka 23 n’abakuru.

Ingimbi zirakina intera y’ibilometero 11,2 zizenguruka mu Mujyi wa Eldoret, mu gihe abagabo n’abatarengeje imyaka 23 bakina intera y’ibilometero 33,8.

Muri Shampiyona Nyafurika iheruka ya 2023 yabereye muri Ghana aho u Rwanda rwari rufite abakinnyi 12 baruhagarariye, rukaba rwaratahanye imidali 8 irimo ibiri ya Zahabu, itatu ya Feza n’itatu y’Umuringa.

Shampiyona Nyafurika y'amagare iratangira gukinwa kuri uyu wa Gatatu