Bukayo Saka yijeje abakunzi ba Arsenal igikombe cya Shampiyona

Arsenal itozwa na Mikel Arteta imaze imyaka ibiri ikomanga ku gikombe cya Shampiyona ariko ikakibura ku munota wa nyuma. Abakunzi b'iyi kipe bakumbuye igikombe cya Shampiyona, cyane ko bagiheruka mu mwaka w'imikino wa 2003-04 ubwo batozwaga na Arsene Wenger.

Abagize ikipe ya Arsenal barangajwe imbere na Bukayo Saka, baremeza ko kuri iyi nshuro  izatwara iki gikombe nta gahunda yo kugitakaza ku nshuro ya Gatatu. 

Ubwo Bukayo Saka yaganiraga na CBS Sports yayihamirije ko uyu mwaka w'imikino ugomba kuba mwiza kuri Arsenal ndetse bagatwara igikombe cya Shampiyona. 

Bukayo Saka yagize ati "Ntabwo nshaka kwishyiraho igitutu gikomeye cyane. Gusa navuga ko uyu mwaka Arsenal izatwara igikombe cya Shampiyona. Imyaka ibiri ishize twagarukiraga ku mwamba. Uyu mwaka nta gahunda yo gucika intege, ahubwo ni uwo gutwara ibikombe".

Bukayo Saka yashimangiye ko ashaka kwegukana igikombe gikomeye cyane kuko ngo yababajwe no kuba Arsenal imaze gutakaza ibikombe bibiri kandi yari mu buryo bwo kubyegukana, ndetse akaba yari no mu ikipe y'igihugu y'u Bwongereza imaze gutakaza imikino ibiri ya nyuma ya Euro.

Ubwo Arsenal yari imaze gutsinda ikipe ya Paris Saint-Germain ibitego 2-0 muri UEFA Champions League, Saka yakomeje avuga ko mu myaka yatambutse yagiye acibwa mu myanya y'intoki n'ibikombe, gusa uyu mwaka akaba ashaka kucyegukana.

Ati: ''Mu myaka itambutse nagiye mbura ibikombe ku maherere, gusa muri uyu mwaka ndiyumvamo imbaraga ko hari ibikomeye nzageraho''. 

Bukayo Saka yijeje abakunzi ba Arsenal igikombe cya Shampiyona 

Bukayo Saka akomeje gufasha Arsenal kwitwara neza muri uyu mwaka w'imikino