Aya Manchester United yafashwe! Menya amateka yaraye yanditswe muri UEFA Champions League

Kuwa Kabiri ni bwo hakinwaga imikino yo ku munsi wa kabiri wa UEFA Champions League ya 2024-2025 iri gukinwa mu buryo bushya. Mu mikino 9 yakinwe hari amakipe ndetse n'abakinnyi banditse amateka n'imibare mishya muri iri rushanwa.

Rutahizamu wa Manchester City, Erling Haaland mu mukino banyagiriragamo Slovan Bratislava ibitego 4-0, niwe watsinze igitego cya 3 ahita agira ibitego 42 mu mikino 41 ya UEFA Champions League muri rusange amaze gukina. 

Ibi byatumye ahita yandika amateka yo kuba umukinnyi wa mbere mu mateka y'iri rushanwa utsinze ibitego biruta umubare w'imikino amaze gukina.

Undi waciye agahigo ni Rico Lewis aho yabaye umukinnyi wa 3 utarageza imyaka 20 ukiniye ikipe yo mu Bwongereza imikino myinshi muri UEFA Champions League aho yakinaga umukino we wa 9. Ni nyuma ya Trent Alexander Arnold wakinnye 11 naho Cesc Fabregas akina 20.

Kuri uyu mukino kandi iyi kipe ya Manchester City yahise yuzuza imikino 25 itaratsindwa muri UEFA Champions League kuva muri 2022. Aka gahigo ko kumara imikino myinshi itaratsindwa muri UEFA Champions League kari gafitwe na Manchester United gusa, aho nayo yari yaramaze imikino 25 hagati ya 2007 na 2009.

Izindi kipe zigeze kumara imikino myinshi zitaratsindwa muri iri rushanwa ni Ajax na FC Bayern Munich zo zamaze imikino 19. Ajax yo mu Buhorandi yabikoze hagati yo 1994 no mu 1996 ku gihe FC Bayern Munich yo mu Budage yabikoze hagati ya 2001 na 2002.

Ku mukino ikipe ya Arsenal yatsindagamo Paris Saint-Germain ibitego 2-0, Kai Havertz yatsinze igitego mu mukino wahise uba uwa gatandatu wikurikiranya atsindiyemo igitego kuri Emirates Stadium, ibintu byaherukaga gukorwa na Pierre-Emerick Aubameyang muri 2019.

Kuri uyu mukino Bukayo Saka nawe yatsinze igitego gihita kiba igitego cya 9   agizemo uruhare kuva mu mwaka ushize wa 2023, ibintu bimugira umukinnyi wa gatatu ugize uruhare mu bitego byinshi muri UEFA Champions League kuva mu mwaka ushize nyuma ya Vinicius Junior ufite 10 na Harry Kane ufite 9.

Ku mukino Celtic FC yanyagiwemo na Borussia Dortmund ibitego 7-1 byatumye ihita yandika amateka mabi yo kuba indi kipe yo mu bwami bw'u Bwongereza yinjijwe ibitego 5 mu gice cya mbere mu irushanwa ryo ku mugabane w'Iburayi aho byaherukaga gukorwa na Calaburom Town mu 1998.

Imikino ya UEFA Champions League irakomeza kuri uyu wa Gatatu aho saa kumi n'ebyiri n'iminota 45, ikipe ya Girona irakina na Feyenoord naho Shakhtar Donetsk ikine na Atalanta.

Saa tatu z'ijoro Aston Villa irakina na FC Bayern Munich, Benfica ikine na Atletico Madrid, Dinamo Zagreb ikine na Monaco, Lille ikine na Real Madrid, Liverpool ikine na Bologna, RB Leipzig ikine na Juventus naho Sturm Graz ikine na Club Brugge.

Erling Haaland na Manchester City banditse amateka mashya muri UEFA Champions League 

Bukayo Saka yanditse imibare mishya muri UEFA Champions League 

Kai Havertz yatsinze igitego mu mukino wa gatandatu wikurikiranya kuri Emirates Stadium