Kipepeo ya Nadia Mukami na Bruce Melodie yabaye iya Mbere ikorewe amashusho muri 13 zitegerejwe cyane mu Karere

Nk'uko bigaragara ku mbuga zicururizwaho umuziki w’amashusho, indirimbo ‘Kipepeo’ yari imaze ibyumweru bitatu igiye hanze, yamaze kugera hanze mu buryo bw’amashusho.

Ni indirimbo yakiriwe neza n’ibyamamare byo mu Karere nka Bahati n’umugore we Diana Marua bagaragaje ko bishimiye cyane iki gihangano. Inkuru yayo igaruka ku muhungu ubabaza umutima w’umukobwa yishakira indi nkumi.

Album ‘Queen of the East’ iriho indirimbo 13 zirimo izo Nadia Mukami yakoranye n’abahanzi nka Bruce Melodie bakoranye ‘Kipepeo’, Bien Aime bakoranye ‘Nikupende’, Rayvanny yitabaje muri ‘Work’ na Darassa yitabaje muri ‘Siko Sure’.

Nadia Mukami yabonye izuba ku wa 09 Ugushyingo 1996, ni umuririmbyi n’umwanditsi w’indirimbo. Yize amashuri abanza muri Kari Mwailu, ayasoza muri 2009.

Yakomereje ayisumbuye muri Mount Laverna, akomereza Kaminuza muri Maseno aho yakuye impamyabumenyi y'icyiciro cya Kabiri mu birebana n’Imari.

Mu 2015 ni bwo yakoze indirimbo ya mbere yise ‘Barua Ya Siri’. Indirimbo ya Kabiri ni ‘Kesi’, akaba yarayikoze mu 2017. Ibi byamuhesheje gutumirwa nko mu iserukiramuco rya Blaze The Nile na The Luo.

Muri Gashyantare 2019 yashyize hanze indirimbo ‘Radio Love’ yakoranye na Arrow Bwoy, ikaba yarakiriwe neza byo ku kigero cyo hejuru ndetse yamuhesheje ibihembo bitandukanye kandi mu 2019 yahagarariye Kenya muri Coke Studio Africa.

Muri 2020 ni bwo yashyize hanze uruhurirane rw’indirimbo [EP]. Imwe muri izo nndirimbo ni ‘Jipe’ yakoranye na Marioo ikaba yararushijeho kuzamura uburyohe bw’iyi EP.

Kuri iyi EP kandi yakoranye n’abahanzi bafite izina rizwi nka Khaligraph Jones, Maua Sam, Fena Gitu, DJ Joe Mfalme, Sanaipei Tande, Tamy Moyo wo muri Zimabwe, Orezi wa Nigeria na Lioness wa Namibia.

Muri 2020 yari mu bahanzi bahataniye ibihembo bya HiPipo. Naho mu mwaka wa 2021 Nadia yaje guhatana muri MTV Africa Music Awards.

KANDA HANO UREBE KIPEPEO YA NADIA MUKAMI NA BRUCE MELODIE

Kipepeo igaruka ku nkuru y'urukundo rurimo ubuhemu yamaze kugera hanze mu buryo bw'amashushoBruce Melodie ari mu bahanzi bari kwitabazwa cyane n'abandi bo mu bihugu byo mu Karere