Manchester City yanganyije na Newcastle United igitego kimwe kuri kimwe, yongera gutakaza amanota abiri mu mikino ibiri yikurikiranya, bivuze ko imaze gutakaza amanota ane mu mukino yombi.
Newcastle United yari yakiriye Manchester City kuri St James Park stadium mu mukino w'umunsi wa Gatandatu wa Shampiyona y'u Bwongereza "English Premier League 2024-25".
Ni umukino benshi bari bitezemo gutungurwa ku ikipe ya Manchester City kuko mu minsi ishize iherutse gutakaza inkingi ya mwamba Rodri wavunikiye ku mukino wa Arsenal.
Abakinnyi babanje mu kibuga ku ruhande rwa Manchester City ni Ederson; Walker, Akanji, Dias, Gvardiol, Lewis, Kovacic, Gundogan, Bernardo, Haaland na Grealish.
Abasimbura ba Manchester City bari Ortega Moreno, Carson, Stones, Nunes, McAtee, Foden, Savinho na Doku.
Ku ruhande rwa Newcastle United, abakinnyi babanje mu kibuga ni Pope, Trippier, Schar, Burn, Hall, Tonali, Guimaraes, Joelinton, J. Murphy, Gordon na Barnes.
Abasimbura bayo bari Dubravka, Krafth, Osula, Livramento, Almiron, Kelly, Willock, Longstaff na A. Murphy.
Ni umukino watangiye Manchester City iri kuboneza umupira neza, gusa gutangirana igitego biranga kuko ba myugariro ba Newcastle United bari bahagaze neza.
Gukina neza kwa Manchester City kwatumye ku munota wa 35, myugariro ukomoka muri Croatia Josco Gvardiol acenga ba myugariro ba Newcastle United atanga umupira kwa Jack Grealish atsindira Manchester City igitego cya mbere.
Igitego cya Jack Grealish cyabonetse ku munota wa 35 ni cyo cyasoje igice cya mbere cyarangiye Manchester City iyoboye n'igitego kimwe ku busa bwa Newcastle United.
Mu gice cya kabiri, abakinnyi ba Newcastle United bagarukanye imbaraga zidasanzwe, nuko ku munota wa 58 ubwo Anthony Goldon yacengaga umuzamu wa Manchester City Ederson Moraes, byarangiye Moraes amuteze nuko Newcastle United ibona Penaliti.
Nk'uko Anthony Goldon ari we wakoreweho Penaliti, yaje kuyiterera aba atsinze igitego cyatumye amakipe yombi atangira gukina anganya igitego kimwe kuri kimwe.
Nyuma yo gutsinda igitego cyo kwishyura, Newcastle United yagumye kugerageza uburyo ngo irebe ko yatsinda icya kabiri, na Manchester City iguma gushaka uko yatsinda igitego cya kabiri, gusa uburyo impande zombi zari zakaniye umukino, kubona igitego biba intambara.
Iminota 90 isanzwe yarangiye Manchester City inganya na Newcastle United igitego kimwe kuri kimwe, nuko hongerwaho iminota irindwi. Manchester City yagumye kwatakana imbaraga zidasanzwe, gusa umuzamu wa Newcastle United na ba myugariro baguma kuba ibamba.
Umukino warangiye amakipe yombi anganya igitego kimwe kuri kimwe, nuko Manchester City yuzuza amanota 14, ikaba imaze gutakaza amanota ane.
Umuzamu wa Manchester City Ederson Moraes ni we wakoze penaliti yatumye Man City ihomba amanota atatu
Penaliti yatsinzwe na Anthony Goldon ni yo yatumye Manchester City ibura amanota atatu
Erling Haaland yasoje umukino wa Newcastle United adatsinze igitego
Jack Grealish ni we watsinze igitego cya Manchester City
Eng
RSS 
TANGA IGITECYEREZO