Kylian Mbappé wari wamaze gufata irangi ashobora gukomwa mu nkokora n'imvune

Kuwa Kabiri ni bwo ikipe ya Real Madrid yatsindaga Deportivo Alaves ibitego 3-2 mu mukino wo ku munsi wa 7 wa shampiyona y'icyiciro cya mbere muri Espagne.

Ibitego bya Real Madrid byatsinzwe na Lucas Vasquez ku munota wa 1, Kylian Mbappé ku munota wa 40 ndetse na Rodrigo ku munota wa 48 mu gihe ibya Deportivo Alaves byatsinzwe na Benavidez ku munota wa 85 na Garcia ku munota wa 86.

Muri uyu mukino Kylian Mbappé yavuye mu kibuga ku munota wa 80 asimburwa na Arda Guler. Nyuma y'uyu mukino umutoza wa Real Madrid, Carlo Ancheloti yemeje ko uyu mukinnyi ari we wisabiye kuva mu kibuga bitewe n'uko yumvaga atameze neza.

Usibye ibi, ikinyamakuru Marca cyanditse ko Kylian Mbappé yagize ikibazo cy'imvune ndetse bikaba biteganyijwe ko uyu munsi ari bwo abaganga bari bumukorere isuzuma kugira ngo harebwe niba yavunitse.

Uyu mukinnyi ahuye n'iki kibazo nyuma yuko yari amaze gufata irangi kuva ageze muri Real Madrid dore ko mu mikino 9 amaze kuyikinira yatsinzemo ibitego 7.

Mu gihe Mbappé yaba yagize ikibazo cy'imvune byatuma asiba imikino imwe n'imwe irimo n'uwo mu Cyumweru Real Madrid izakinamo na Atletico Madrid.

Kylian Mbappé ashobora gukomwa mu nkokora n'ikibazo cy'imvune