EPL: Chelsea yandagaje Wolves

Uri iki cyumweru, Wolves yari yakiriye Chelsea mu mukino w'umunsi wa kabiri muri Shampiyona y'u Bwongereza English Premier League 2024-25. Abakinnyi babanje mu kibuga ku ruhande rwa Chelsea ni Sanchez, Gusto, Fofana, Colwill, Cucurella, Caicedo, Enzo, Madueke, Palmer, Mudryk na Jackson

Abasimbura ba Chelsea ni Jorgensen, Tosin, Badiashile, Veiga, Dewsbury-Hall, Neto, Nkunku, Joao Félix na Guiu.

Ku ruhande rwa Wolves, abakinnyi babanje mu kibuga ni Sam, Doherty, Mosquera, Toti, Ait-Nouri, J Gomes, M Lemina, Hwang, Bellegarde, Cunha na Strand Larsen.
Abasimbura ba Wolves ni Bentley, Bueno, Traore, Podence, Dawson, R Gomes, Doyle, Sarabia, Guedes.

Ni umukino Chelsea yamanukanye umujinya mwinshi, kuko ku munsi wa mbere wa English Premier League 2024-25, yari yatsinzwe na Manchester City ibitego bibiri ku busa.

Umujinya wa Chelsea, watumye ku munota wa kabiri Umunya-Senegal Nikolas Jackson afungura amazamu ku ruhande rwa Chelsea.

Wolves ikimara gutsindwa igitego cya mbere, nayo yariye Amavubi, ni uko ku munota wa 27 Matheus Cunha ayibonera igitego cyo kwishyura.

Ku munota wa 45, Nikolas Jackson yongeye gutanga umupira kwa Cole Palmer, maze atsindira Chelsea igitego cya kabiri.

Nk'uko yari yabigezeho yishyura igitego cya mbere, Wolves ikimara gutsindwa igitego cya kabiri, yongeye irya Amavubi, maze ku munota wa 46+6 Jørgen Strand Larsen ayitsindira igitego cya kabiri.

Igitego cya Jørgen Strand Larsen, ni nacyo cyasoje igice cya mbere cyarangiye amakipe yombi anganya ibitego bibiri kuri bibiri.

Mu guce cya kabiri, Chelsea yagarukanye imbaraga zidasanzwe,  ku munota wa 49 Noni Madueke ayitsindira igitego cya gatatu ku mupira yahawe na Cole Palmer. Ku munota wa 58, na none Cole Palmer yongeye gutanga umupira kwa Noni Madueke,  atsinda igitego cya Kane.

Ku munota wa 63, Cole Palmer yongeye gutanga umupira kwa Noni Madueke, nk'uko byagenze ku gitego cya gatatu n'icya kane,  Noni Madueke atsindira Chelsea igitego cya gatanu.

Ku munota wa 80, Joao Felix ukomoka muri Portugal, yatsindiye Chelsea igitego cya Gatandatu, ku mupira yahawe na Pedro Neto.

Igitego cya Gatandatu cya Joao Felix, ni nacyo cyasoje umukino warangiye ari ibitego bitandatu kuri bibiri bya Wolves. 

Gutsinda uyu mukino, byatumye Chelsea ibona amanota atatu ya mbere muri English Premier League 2024-25, kandi inashimangira ko abakinnyi bayo bato bari kumenyerana. 

Chelsea yicariye Wolves iyitsinda ibitego bitandatu kuri bibiri 

Cole Palmer yongeye kugaragaza imbaraga zidasanzwe atanga imipira itatu yabyaye ibitego