Ivanguraruhu rigiye guhuza Perezida w'u Bufaransa n'uwa Argentine

Ubwo Abakinnyi b'ikipe y'igihugu ya Argentine bishimiraga igikombe cya Copa America cya 2024 batashye bari mu mudoka,uwitwa Enzo Fernandes yagiye kuri Live ya Instagram maze we n'abandi bakinnyi bagenzi be baririmba indirimbo zibasira ikipe y'igihugu y'u Bufaransa.

Muri iyi ndirimbo yaterwaga n'uyu mukinnyi wa Chelsea abandi bakikiriza, bavugaga ko hari abakinnyi bakinira ikipe y'igihugu y'u Bufaransa kandi baturuka ku Mugabane wa Afurika. 

Aha bavuzemo abarimo Kylian Mbappé ufite Se umubyara ukomoka muri Cameroon mu gihe nyina we akomoka muri Algeria.

Ibi babikoze bibutsa ikipe y'igihugu y'u Bufaransa ko bayitsinze ku mukino wa nyuma w'igikombe cy'Isi cya 2022 nubwo ifite abakinnyi bakomoka ku Migabane itandukanye none bakaba banegukanye igikombe cya Copa America.

Nyuma y'uko bibaye byagiye bifata intera umunsi ku munsi kugeza n'aho ishyirahamwe ry'umupira w'amaguru mu Bufaransa ryavuze ko rigomba kurega irya Argentine kuko abakinnyi babo bakoreye irondaruhu ababo.

Ntabwo byagarukiye aho kubera ko  mu mikino ya Olympic iri kubera mu Bufaransa ubwo ikipe y'igihugu ya Argentine yari igiye gukina na Morocco,hakaririmbwa indirimbo yubahiriza Argentine, abafana bari muri Stade barasakuje ,batanga "boo" bagaragaza ko ari igihugu cy'irondaruhu.  

Abakinnyi b'iyi kipe y'igihugu kandi batewe amacupa ndetse n'ibishashi by'imiriro. 

Kuri ubu nk'uko ibinyamakuru bitandukanye birimo Daily Mail byabyanditse, Perezida w'u Bufaransa,Emmanuel Macron ndetse n'uwa Argentine,,Javier Milei bagomba guhura kuri  uyu wa Gatanu ubundi bagakemura ibi bibazo.

Perezida wa Argentine yageze mu Bufaransa ku munsi w'ejo ku wa Kane aho yari agiye mu muhango wo gutangiza imikino ya Olympic ku mugaragaro gusa agomba kugirana ikiganiro na mugenzi we w'u Bufaransa mu buryo bwihariye.

Perezida w'u Bufaransa, Emmanuel Macron agiye guhura n'uwa Argentine kubera ivanguraruhu 

Perezida wa Argentine, Javier Milei agiye guhura n'uw'u Bufaransa kubera irondaruhu abakinnyi be bakoze 

Enzo Fernandes ni umwe mu banenzwe cyane bigera n'aho abakinnyi bakinana muri Chelsea bareka kumurikira ku mbugankoranyambaga ze bitewe n'ivangurahu yakoranye n'abakinnyi bagenzi be ba Argentine