U Rwanda rwabonye uzaruserukira umwaka utaha! Miss Supranational 2024 igeze ahakomeye

Niba ukurikiranira hafi ibijyanye n’amarushanwa y’ubwiza, urabizi neza ko irushanwa rya Miss Supranational 2024 ririmbanije. Umukobwa w’umunyamahirwe uzasimbura Andrea Aguilera wa Ecuador azamenyekana mu ijoro ryo kuwa Gatandatu w’icyumweru gitaha tariki 6 Nyakanga 2024, mu birori bizabera i Nowy Sącz, muri Pologne.

Kuri ubu rero, byamaze kwemezwa ko umukobwa witwa Uwase Kimana Emelique ariwe uzaserukira u Rwanda mu irushanwa rya Miss Supranational ry’umwaka utaha. Ni nyuma y’uko mu mpera z’icyumweru gishize, uyu mukobwa w’imyaka 24 y’amavuko yahigitse bagenzi be mu marushanwa ya Rwanda Universal Personality yasorejwe i Kigali.

Mu bamuguye mu ntege, harimo Ingabire Ndinda Marie Ange wabaye igisonga cya mbere, Ishimwe Esther wabaye igisonga cya kabiri na Kanyange Charlotte wabaye igisonga cya gatatu..

Akimara gutangazwa ko ariwe wegukanye iri rushanwa, Emelique yarenzwe n’amarira y’ibyishimo, ari nako abandi bakobwa bari bahatanye bose bamwifuriza amahirwe masa mu rugendo rushya atangiye.

Yabwiye The New Times ati: “Ntabwo byari byoroshye kubigeraho. Ntegereje kuzahatana no muri Miss Supranational. Iyi ni paji nshya ngomba guhatanira gutsinda. Mfite byinshi byo kwibandaho, harimo no gukora imyitozo myinshi kugira ngo nzahagararire neza igihugu cyanjye. Ni urugendo rwiza kandi rushya rwose, nubwo rutoroshye.”

Emelique, ni umunyeshuri wiga mu mwaka wa mbere mu ishami rya 'Marketing' muri Kaminuza ya Kigali. Yakuze arota kuzahagararira u Rwanda mu marushanwa runaka ku rwego rw'isi. Inzozi ze zabaye impamo nyuma yo kubona itike yo kuzajya muri Miss Supranational 2025. 

Uyu mukobwa, agiye gukurikira abakobwa barimo Umuratwa Anitha (2021), Shanita Umunyana (2019), Charlotte Umulisa (2022) na Miss Rwanda 2014 Colombe Akiwacu (2015) baserukiye u Rwanda muri iri rushanwa.

Uretse guhagararira u Rwanda, Uwase Kimana Emelique yanahembwe amafaranga angana na Miliyoni imwe y’amafaranga y’u Rwanda azamufasha mu bikorwa bye bitandukanye.

Universal Personality ni urubuga rugamije kwimakaza umuco w’ubumuntu ku isi yose abantu bakarenga imbibi z’ibibatandukanya ahubwo bakimakaza indangagaciro z’ubupfura.

Akarusho gahari, ni uko abakobwa bose batsinze muri iri rushanwa, bazagenda bahabwa amahirwe yo guhagararira u Rwanda mu marushanwa atandukanye ku isi. Uw’uyu mwaka wa mbere azaserukira u Rwanda muri Miss Supranational 2025.

Ibirori by’irushanwa rya Miss Supranational rigiye kuba ku nshuro ya 15, bizayoborwa n’umunya-Afurika y’Epfo Nico Panagio uzanayobora ibirori bya Mister Supranational 2024, afatanye n’umukinnyi wa filime w’umwongereza Kasia Koleczek.

Muri bihugu bikomeje kuza imbere mu matora ari gukorwa mu byiciro binyuranye, harimo Brazil, Denmark, Haiti, Indonesia, Nigeria, Leta Zunze Ubumwe za Amerika, Venezuela, Vietnam, n'ibindi.

Uwase Kimana Emelique niwe uzahagararira u Rwanda muri Miss Supranational 2025

Miss Andrea Aguilera ari kwitegura kwambika ikamba uzamusimbura

Miss Supranational 2024 irarimbanije