Mu gitondo cyo kuri uyu wa Gatanu, muri Leta Zunze Ubumwe za Amerika hakinwe imikino itandukanye ya NBA. Los Angeles Lakers yongeye gutsindwa na Atalanta Hawks, mu gihe Boston Celtics yo yatsinze Indiana Pacers.
Atlanta Hawks yari yakiriye Los Angeles Lakers kuri State Farm Arena. Ni umukino warangiye Los Angeles Lakers yongeye gutsindwa amanota 122 ku 138 ya Atlanta Hawks.
Los Angeles Lakers yongeye kurangiza umukino isebye cyane, dore yasoje nta gace na kamwe itsinze cyangwa ngo ikanganye.
Uduce tune twose dukinwa mu mukino wa Basketball, twayobowe na Atlanta Hawks yari imbere y'abafana bayo.
Mu gace ka mbere, Atlanta Hawks yatsinze amanota 36 kuri 29 ya Los Angeles Lakers, aka kabiri itsinda 31 kuri 27, aka gatatu itsinda 36 kuri 32, naho aka Kane itsinda 35 kuri 34.
Kugeza ubu Los Angeles Lakers imikino imaze gutsindwa niyo myinshi kurusha iyo yatsinze muri NBA uyu mwaka w'imikino. Mu mikino 49 yakinnye, imaze gutsinda imikino 24, itsindwa imikino 25. Kugeza ubu iri ku mwanya wa Cyenda ku rutonde rwo mu Burengerazuba bwa Leta Zunze Ubumwe za Amerika.
Kugeza ubu Los Angeles Lakers ikomeje kugira imibare mibi ku rutonde rwo mu Burengerazuba
Ubwo abo muri Los Angeles bababajwe no kwitwara nabi kwa LA Lakers, i Boston bo babonye intsinzi. Boston Celtics yari yakiriye Indiana Pacers kuri TD Garden. Ni umukino warangiye Celtics imbere y'abafana bayo ishimangiye ko ishaka gutwara igikombe.
Indiana Pacers yo ntabwo yatsinzwe nka Los Angeles Lakers, kuko yo yakozemo, itsinda agace ka gatatu aho yatsinze amanota 37 kuri 25 ya Boston Celtics.
Boston Celtics yari mu rugo, yatsinze agace ka mbere, aka kabiri n'aka kane. Mu gace ka mbere yatsinze amanota 36 kuri 26 ya Indiana Pacers, aka kabiri itsinda 45 kuri 40, naho aka Kane itsinda 23 kuri 21.
Gutsinda uyu mukino byatumye Boston Celtics iguma kuba iya mbere mu Burasirazuba bwa Leta Zunze Ubumwe za Amerika. Mu mikino 48 Celtics imaze gukina, yatakaje imikino 11, itsinda imikino 37.
Boston Celtics yatsinze Indiana Pacers, ikomeza kuba iya mbere mu Burasirazuba
Mu zindi Leta zitandukanye aho muri USA, habaye indi mikino ikomeye. Mu mujyi wa New York, habereye umukino wahuje New York Knicks na Utah Jazz, warangiye New York Knicks yari imbere y'abafana bayo itsinze Utah Jazz amanota 118 ku 103.
Toronto Raptors yagiye muri Chicago, itsindirayo Chicago Bulls amanota 118 ku 107, naho Golden State Warriors itsinda Philadelphia amanota 119 ku 107.
Eng
RSS 
TANGA IGITECYEREZO