Mapinduzi Cup: APR FC yatangiye igarikwa

Guhera tariki 28 Ukuboza 2023 kuzageza tariki ya 13 Mutarama 2024 muri Zanzibar hari kubera imikino ya Mapinduzi Cup. 

Kuri uyu wa Mbere saa cyenda n'iminota 15 ikipe ta APR FC iri mu itsinda B yakinnye umukino wayo wa mbere na Singida Fountain Gate FC ikinamo n'ubundi rutahizamu w'umunyarwanda Kagere Meddie.

Ni umukino watangiye ikipe y'Ingabo z'igihugu iri hejuru ndetse ku munota wa 2 gusa yahise ifungura amazamu ku gitego cyari gitsinzwe na Victor Mbaoma kuri kufura nziza yakorewe Mugisha Gilbert wazamukanye umupira acenga, ba myugariro ba Singida Fountain Gate FC bakamutereka hasi.

Nyuma yo gutsindwa igitego, iyi kipe yo muri Tanzania yatangiye kurusha APR FC ku buryo bugaragara yiharira umupira. Yaje kwishyura ku munota wa 45+4 ku ikosa Pavel Ndzira yakoreye rutahizamu wa Singida, umusifuzi ahita atanga penariti. 

Yahise iterwa neza na Elvis Rupia ayitereka neza mu izamu. Mu gice cya kabiri n'ubundi ikipe y'Ingabo z'igihugu yaje ikomeza kurushwa cyane maze ku munota wa 75, Morice Chuckwu arekura ishoti ari inyuma y'urubuga rw'amahina ariko Pavelh Ndzira akora amakosa agiye kurifata riramucika rihita rijya mu izamu nta mpaka.

Ku munota wa 87, France Kazadi yatsinze igitego cya 3 maze APR FC birangira intsinzwe ibitego 3-1 mu mukino wayo wa mbere mu irushanwa rya Mapinduzi Cup. Iyi kipe y'Ingabo z'igihugu izasubira mu kibuga kuwa Gatatu ikina na JKU SC yo muri Zanzibar.

Victor Mbaoma yishimira igitego yatsinze

APR FC yatsinzwe na Singida Fountain Gate FC ibitego 3-1