Byusa Pacifique na Nishimwe Gisèle begukanye isiganwa rya mbere rya ‘Rwanda Youth Racing Cup 2025'

Ni isiganwa ryakinwe kuri iki Cyumweru tariki ya 27 Mutarama 2025 mu karere ka Bugesera kuri Field of Dreams.

Byusa Pacifique ukinira Les Amis Sportifs watsinze isiganwa mu cyiciro cy’abahungu batarengeje imyaka 19 yakoresheje iminota 53 n’amasegonda 25 nyuma yo kuzenguruka inshuro 24 intera ya kilometero 1,2.

Ku mwanya wa Kabiri hasoreje Tuyipfukamire Jean Faustin ukinira Muhazi Cycling Generation naho Mugabo Jules wa Zip Cycling Academy aba uwa Gatatu mu gihe abarimo Tuyipfukamire Aphrodice bo batigeze basoza isiganwa.

Mu bakobwa batarangeje imyaka 19, Nishimwe Gisèle ukinira Cine Elmay niwe wegukanye umunsi wa mbere akoresheje iminota 55 n’amasegonda 22 nyuma yo kuzenguruka inshuro 19. Yakurikiwe na Niyogisubizo Grace ukinira Komera Cycling Women na Mutoniwase Béatha ukinira Les Amis Sportifs mu bakinnyi 12bakinnye iki cyiciro.

Mu batarengeje imyaka 17, hatsinze Shema Emmanuel ukinira Les Amis Sportifs mu bahungu na Irasetsa Amina ukinira LWD Cycling Team mu bakobwa naho mu batarengeje imyaka 15, mu bahungu hatsinda Sibomana Arsène ukinira Cine Elmay mu na Liza Jehovayire ukinira Ndabaga Women Team mu bakobwa.

Mu cyiciro cy’abatarengeje imyaka 13, Igiraneza Ogilla ukinira Zip Cycling Academy niwe wabaye uwa mbere mu bakobwa naho mu bahungu hatsinda Sano Francis nawe ukinira Zip Cycling Academy.

Frank Ayoun ukinira Zip Cycling Academy yabaye uwa mbere mu bahungu batarengeje imyaka 11 naho mu bakobwa hatsinda Uwamahoro Françoise ukinira Ndabaga Women Cycling Team.

Byusa Pacifique wegukanye umunsi wa mbere wa Rwanda Youth Racing Cup 2025 mu bahungu batarangeje imyaka 19 

Nishimwe Gisèle wegukanye umunsi wa mbere wa Rwanda Youth Racing Cup 2025 mu bakobwa batarangeje imyaka 19